Скопјанец доби кривична пријава за измама, бидејќи ветил дека за паричен надомест ќе изврши приватизација на градежно земјиште во сопственост на државата, информира Министерството за внатрешни работи.
„Единицата за економски и компјутерски криминал при СВР Скопје поднесе кривична пријава против А.А.(38) од Скопје, поради постоење основи на сомнение за сторено кривично дело „измама” по чл.247 од Кривичниот законик“, соопшти МВР.
Од МВР информираат дека пријавениот со лажно прикажување на факти довел во заблуда лице од Скопје дека за паричен надомест од 30.000.евра пред надлежните органи ќе му заврши постапка за приватизација на градежно земјиште во државна сопственост со вкупна површина од 13.764 квадратни метри на катастарска парцела во Визбегово.
„Тој во 2016 година обезбедил лажен документ – Решение за приватизација на градежно земјиште во државна сопственост стекнато без платен надомест, наводно издадено од Министерството за финансии, Управа за имотно правни работи – Подрачно одделение за првостепена управна постапка Кратово, во кое што било наведено дека поднесеното Барање за приватизација на градежно земјиште во државна сопственост од оштетениот се уважува и земјиштето во државна сопственост се приватизира. Решението било заверено на нотар и спроведено во Агенцијата за катастар на недвижности на основа на што било издаден имотен лист на име на оштетениот“, соопшти МВР.