Полицијата поднесе кривична пријава против екс директорот на Домот за култура во Крушево за злоупотреба на службената положба и овластување.
Според информациите во полицискиот билтен, 47-годишниот С.Д. во текот на 2016 и 2017 година, како директор на Домот на културата “Наум Наумовски-Борче“ во Крушево, без да распише тендер за јавни набавки користел услуги од угостителски објекти за репрезентации и набавувал огревни дрва од повеке фирми. Исто така, за одржување на објектот (Домот на култура) имало доставено фактура за набавка на 30 м2 ламинат, но од извршените проверки било констатирано дека ламинат не бил поставен во ниту една просторија.
Во текот на 2016 година на тендер за набавка на литература била избрана фирмата „Викели“, но надвор од рамките на тендерот, биле купувани книги и од други фирми со кои не бил склучен договор.
Со овие дејствија Домот на културата бил оштетен за вкупен износ од 202.806 денари.