Поп ѕвездата Калиопи ќе биде главна музичка гостинка во Мадрид, Шпанија, на седми април, на предевровизиска забава во организација на тимот Евровизија Шпанија.
Таа е најавена како големата дива на македонската музика, која победи на Скопје Фест во 1996 година, но и двојна претставничка на Македонија на Евровизија во Баку во 2012 година и во Стокхолм во 2016 година.
-Калиопи е најголемата легенда на балканската музика со долга и плодна уметничка кариера. Таа е и голем хуманитарец и ја има добиено наградата Мајка Тереза за нејзината истакната и посветена хуманитарна работа – пишува на страницата на Евровизија Шпанија.
И покрај гостувањето на Калиопи на предевровизиската забава во Мадрид, годинава Македонија нема да учествува на Евровизија.
Според организаторот МРТ, учеството е откажано поради големите финансиски трошоци кои ги повлекува Евровизија, а само котизацијата до лани изнесувала околу 40.000 евра.
Вики Клинчарова