Прашањето за надоместоците е покомплексно отколку што изгледа. Очигледно беше дека веројатно е договорено или на некој начин се чувствувало за потребно, со оглед на ситуацијата во која тие ја вршеа функцијата, изложени дури и на опасност, дека бараат за таа функција посебен надомест. Мислам дека тоа малку е несмасно и проблематично изведено, бидејќи доверливоста спаѓа во нормалните одговорности, тоа е работа на обвинителите и тоа го има секој обвинител, не само овие, и не може да е оправдување за толку високи хонорари.
Ова денеска го изјави претседателот на Хелсиншки комитет и професор на Правниот факултет при УКИМ Гордан Калајџиев, во изјава за медиуми по одбележувањето на 25 години Хелсиншки комитет.
Смета дека е проблематично што овие средства се делени и без правилник и дека обвинителката Катица Јанева ги делела, како што рече, малку од ракав и со тоа претпоставува таму правела и раздор, или придобивала поблиски соработници, што смета дека е и малку шпекулација.
Во однос на ветингот во судството, рече дека тоа е многу сложено прашање и има неколку опасности.
– Поучени од лустрацијата и слични процеси мислам дека може да се исполитизира и само да се изгуби и време, и дури и да има штетни последици. А исто би значело и маргинализирање или поткопување на нормалното функционирање на системите кои ние ги имаме, кои треба да се подбутнат за да функционираат, смета тој.
Оцени дека на ветингот може да се гледа и како на нешто посуштинско, односно да се направи некакво рестартирање на системот.
– Според мене, би било подобро да се размисли за ремоделирање на системот, но за тоа треба допрва да се води дискусија, затоа што овој систем на судска самоуправа, што се форсира во земјите во транзиција и на младите демократии во повеќе држави особено во Македонија не даде успех и резултати како што се очекуваа, со оглед на тоа што функционираа определени механизми во овие држави, кои што наместо да ги направи овие судски и обвинителски совети алатка за заштита на независноста, ги направи алатка за политички влијанија, рече Калајџиев.
За политичарите вели дека се главниот вирус во судството што го прави корупмирано.
– Тие се главниот вирус во судството што го корупмира а сега се спасуваат дека судиите се расипани, они си се добри, судиите се расипани сега нив ќе ги проветруваме. Нас ни треба да ги реформираме политичките партии кои функционираат бољшевички, со една елита што ја раководи целата држава, без да се има сенс за институциите, меѓусебните контроли во една модерна демократија, оценува професорот Калајџиев. МИА