688
До крајот на денов во државава ќе имаме променливо облачно и значително постудено време, на повеќе места со повремени врнежи од дожд на ниските и снег на повисоките места и на планините. Особено на планините се очекува формирање на снежна покривка некаде од 10 до 20 сантиметри, претежно на запад каде врнежите ќе бидат поинтензивни. Ќе дува умерен до засилен ветер од западен и од северозападен правец. Повремено на некои места ветерот ќе биде СИЛЕН (со брзина до околу 80 км/час).
Снежната граница има услови да се спушти на надморска височина од под 1000 метри и тоа особено на запад и на север. Максималните дневни температури ќе се искачуваат во интервалот од 3 до 10 степени, во најтоплите предели истите се очекува да се искачат до околу 14 степени. Во Скопје времето ќе биде променливо облачно со повремени врнежи од дожд, на околните планини врнежите ќе бидат од снег а ќе дува и умерен до засилен ветер од западен и од северозападен правец.
Максималната дневна температура ќе се искачи до околу 9 степени што значи истата ќе бележи тенденција на значително опаѓање во однос на вчерашната. Циклонот ЈАКОБ ќе влијае на времето кај нас и во текот на утрешниот ден, утре ќе имаме променливо облачно време а од запад и од северозапад ќе започнат нови врнежи од дожд, на планините и на повисоките места, особено на запад врнежите ќе бидат од снег каде снежната покривка и понатаму ќе се зголемува. Ќе дува слаб до умерен ветер претежно од јужен правец и истиот повремено ќе засилува. Кон крајот на денот особено долж Повардарието ќе дува умерен до засилен ветер од северен правец.
Максималните температури утре ќе се искачуваат во интервалот од 4 до 13 степени.
За време на викендот ќе има стабилизација на времето, во сабота наутро поради разведрувањето минималните температури ќе бидат значително пониски, односно истите ќе се спуштаат во интервалот од -8 до 2 степени. Максималните за време на викендот повторно ќе бидат во пораст и ќе се искачуваат во интервалот од 7 до 16 во сабота и од 11 до 18 степени во недела. Во текот на ноќта недела кон понеделник на запад и север ќе има нови повремени врнежи од дожд, на највисоките планини (над 2000 метри) врнежите ќе бидат претежно од снег.
Подготви: Славчо Попоски