Додека во Бугарија се уште се води дебата и се анализира небезбедниот автопат „Струма“ каде изгоре македонскиот автобус и загинаа 45 патници од Македонија, во земјава веќе десетина година нема нови податоци колку црни точки има низ нашите патишта.
Според податоците од 2010 година, низ државата биле регистрирани 169 црни точки.
Министерот за внатрешни работи Оливер Спасовски постојано се фали дека бројот на сообраќајки е многу намален и тоа од минатата година досега за 55 проценти.
Според најновата мапа што ни ја испратија од Министерството за внатрешни работи, која е изработена некаде во ноември минатата година, во земјава има 13 црни точки на патиштата. Тие се дефинирани како опасни места, локации, црни зони каде што често доаѓа до сообраќајни несреќи.
Од Министерството за внатрешни работи објаснуваат дека оваа мапа е изработена за нивни потреби и овие црни точки се одредени по бројот на сообраќајни несреќи што се случиле минатата година. Но, ново истражување за сите црни точки низ земјава, нема направено.
Опасно место, односно „црна точка“ е секој краток дел од патната должина, или крстосница на која во текот на ист временски период се случуваат поголем број сообраќајни незгоди во однос на сите други места од патната мрежа со иста должина и иста категорија.
– „Црните точки“ во поголем дел претставуваат пропусти на тој што го проектирал и изградил патот, поради лошите технички елементи на патот, како што се малите радиуси, малите напречни наклони, непрегледноста или нефункционалното решение на крстосниците, но „црните точки“ исто така можат да настанат и со тек на експлоатација, поради истрошеност на асфалтниот коловоз, пропаднувања на патот, објаснува професоро на Техничкиот факултет во Битола, Зоран Јошевски.
Но, кај нас поимот „црна точка“ не е ниту дефиниран во Законот за безбедност на сообраќајот на патиштата, ниту, пак, е дефиниран сообраќаен знак со кој учесниците во сообраќајот можат да се известат дека наидуваат на ваков дел од патот.
–Во нашата земја не е дефинирана ниту методологија за детерминирање на опасните места „црни точка“ на патната мрежа, како во населените места, така и надвор од населени места.
За да можеме да ја мериме и оценуваме безбедноста на нашите патишта, потребно е што е можно побргу да воспоставиме мерливи индикатори, односно прифатена методологија на европско и на светско ниво, која ќе ни укажува на аномалиите на патната мрежа, а со тоа и превенирање уште пред да ни се случат вакви немили настани, како што е сообраќајната незгода во соседна Бугарија, вели Јошевски.
Целиот текст прочитајте го во новиот број на неделникот кој можете да го купите и во електронска форма на овој линк.
Фросина Факова-Серафиновиќ