Поранешната пратеничка од ВМРО-ДПМНЕ, која подоцна стана независен пратеник во македонското Собрание, Емилија Александрова стана регионален началник за АНБ на Берово и Делчево.
Според нашите информации, тоj регион ги опфаќа и градовите Пехчево и Македонска Каменица.
„Фокус“ стапи во контакт со екс пратеничката, која ниту ја потврди, ниту ја демантираше информацијата дека е вработена во АНБ, туку за одговори на ова прашање не упати да се обратиме до актуелниот директор.
„Јас не можам да ви дадам никакви податоци, за тоа може да каже само директорот на Агенцијата“, истакна Александрова.
Се обидовме да стапиме во контакт и со директорот на АНБ, Виктор Димовски, но се уште не добивме повратни одговори.
Александрова во македонскиот Парламент влезе како пратеник на ВМРО-ДПМНЕ во 2016 година, додека само две години подоцна, поточно во 2018 година таа со уште седум сопартијци гласаа за уставните измени, со кои се смени името на државата во Северна Република Македонија.
Уште истата вечер, после гласањето екс пратеничката на ВМРО-ДПМНЕ беше исклучена од партијата заедно со нејзините колеги, Крсто Мукоски, Елизабета Канческа- Милевска, Нола Исмајловска…, кои подоцна се одделија како независна пратеничка група.
Александрова во јавноста уште е позната и како роднина на поранешниот шеф на тајната полиција, Сашо Мијалков, кој десет години управуваше со УБК.
Во 2019 година УБК замина во историјата, а тогаш официјално беше и првиот работен ден на Агенцијата за национална безбедност, која е најважна институција за државна безбедност.
Ирена Мулачка
