Претседателот на БЕСА, Биљал Касами во изјава за емисијата „200“ на Телевизија Алсат демантира дека кој било друг пратеник од неговата партија би можел да одлучи да остане дел од парламентарното мнозинство.
– Пратениците на Движењето Беса, со својата слободна волја се во оваа позиција, дел од опозицијата согласно преземените одлуки од партијата. Додека не се случи некаква ситуација што се случи, јас имам целосна доверба кон двајцата пратеници на Беса, како што имав целосна доверба кон тројцата, рече Касами.
Тој е уверен дека 61. пратеник потребни за ново парламентарно мнозинство, нема да биде од Движењето Беса.
– Тоа што и понатаму останува како став на Движењето Беса е падот на Владата. Од моментот кога ќе падне Владата, проценуваме дека ќе се создаде сосема нова ситуација, сосема поинакво мнозинство, многу постабилно од оваа што е дискутабилна и оценувам дека на земјата и е потребна политичка влада која ќе ја забрза интеграцијата кон ЕУ, рече тој.
Првиот човек на оваа партија не ја исклучува можноста за идна соработка ниту со СДСМ, ниту со ВМРО-ДПМНЕ, но вели дека тоа треба да биде врз основа на договор за да се работи на напредокот на земјата кон ЕУ. Притоа, Касами ја исклучува можноста да бидат дел од Влада каде што би била и ДУИ.