При секое носење на Детални урбанистички планови во општина Карпош ќе се користи Зелен Урбан Кодекс за да се заштити зеленилото во оваа општина, најави кандидатот на СДСМ и коалицијата за градоначалник на Општина Карпош, Стефан Богоев. Со овој кодекс би се направил и попис на целосното зеленило во општината, а би се направиле и нови парцели за зеленило кога ќе се носат Деталните урбанистички планови.
-За жал, во општина Карпош, парковите и зеленилото се повеќе и повеќе се намалуваат и се повеќе и повеќе се запуштени. Ние како идна локална власт во општина Карпош, се обврзуваме пред граѓаните да обезбедиме чист воздух и здрава животна средина за живеење – изјави Богоев.
Тој најави и ревизија на Деталните урбанистички планови донесени од власта на градоначалникот, Стевче Јакимовски, кои, рече, имале за цел да го уништат зеленилото за сметка на нови градежни парцели и нови бетонски згради.
– Тоа се особено Деталните урбанистички планови за Тафталиџе 1, Карпош 3 и Карпош 4 и секаде онаму кадешто има сомнителни активности или сомнежи за криминал при носењето на Деталните урбанистички планови – изјави Богоев.
Заедно со кандидатите за советници на коалицијата, Богоев денеска го собираше ѓубрето во малото паркче во Карпош 2.