Македонија е „дефектна демократија“ заедно со Црна Гора, Србија, Унгарија, БиХ, Албанија и Косово, и е пример за назадување, покажува извештајот на германска фондација Бертелсман кој се објавува на период од две години.
Извештајот за Македонија е правен за периодот 2014-15 година, и во него не се опфатени дел од случувањата од крајот на минатата и почетокот на оваа година на политичката сцена, а државата бележи натамошен пад според Индексот на трансформација.
Во однос на извештајот од 2014 година, Македонија најмногу назадувала во политичките критериуми, поточно во делот на владеењето на правото, и стабилноста и демократските институции.
Што се однесува до владејачката партија, во извештајот стои дека ВМРО-ДПМНЕ, како и унгарската партија Фидес, „доминираат со парламентите и го прошириле своето влијание врз судството, медиумите и другите институции“, а „тоа го прават преку користење на техниките на популистичка мобилизација“.