Текстот е објавен на 19 октомври 2023 година во неделникот Фокус со број 1.463.
Меџити е долгодишен функционер на ДУИ, кој бил партиски потпретседател, шеф на републички изборен штаб, прв човек на чаирскиот огранок, градоначалник на Чаир, координатор на пратеничка група. Но, тој влезе во конфликт со партиското раководство на чело со Ахмети. Сепак, т.н. „огнена група“ се подели и ја загуби битката, што го натера да формира нова партија – Демократско движење, која формираше опозициски блок со Беса и Алтернатива. Во интервју за „Фокус“, Меџити неодамна упати тешки крики кон поранешната партија, велејќи дека е партија со изминат рок, која наликува на криминален клан што го контролира бизнисот со казина, лихварство, дрога…
Разговарал: Влатко СТОЈАНОВСКИ
ФОКУС: Ги завршивте ли сите процедури и формалности околу новата партија?
МЕЏИТИ: Да, имаше некои опструкции во текот на процедурите, но ги надминавме. Дадовме напори и го регистриравме субјектот со сите пропратни елементи.
ФОКУС: На што поточно мислите кога велите опструкции?
МЕЏИТИ: Па при регистрирање. Државјанствата мора да бидат нови, инспекции по нотарите… Очекувано беше и тоа, гледаме секојдневно како делуваат. Сепак, процедурата е завршена и Демократското движење е правен субјект со печат, сметка…
ФОКУС: Ако е познато дека вие ќе бидете лидер, кои луѓето ќе бидат ваши најблиски соработници?
МЕЏИТИ: Во нашиот Статут има некои новини. Прво, има одредба која дозволува да има фракции, бидејќи тоа беше една од причините поради кои бевме исклучени од поранешната партија ДУИ.
Второ, имаме и нов систем на организирање. Од 90-тите години, структуралното организирање останало од времето на ПДП. Во минатото поинаку се именуваа поограноци и ограноци, сега имаме друга идеја.
ФОКУС: Каква идеја?
МЕЏИТИ: Ќе имаме координатор за секое избирачко место, за секоја изборна единица и на ниво на изборни зони. Тие координатори ќе бидат членови на Собранието на огранокот и членови на идниот Конгрес, така што секој ќе знае зошто е дојден и што претставува.
Зошто се уште нема избрано потпретседател и други тела освен основачко собрание и претседател? Прво, тоа е поради механизам на одбрана, бидејќи се соочуваме со голем притисок и фокусот на ДУИ е кон нас, ги употребуваат сите начини и мерки да присвојат некој член. И второ, сакаме да се воведе механизмот на меритократија, па кој како ќе се покаже со работа, идеи, делување, така ќе заземе место.
ПР-АГЕНЦИЈА ВО КАЗИНО-БИЗНИС
ФОКУС: Како ќе се профилирате од идеолошки аспект?
МЕЏИТИ: Центар накај десно. Во тек е основање на политичкиот институт „Хасан Приштина“ во рамки на ДД, кој ќе работи на идеолошката ориентација, политичката линија, идеите, структуирање…
ФОКУС: Долги години бевте во ДУИ, која пак важи за лева партија.
МЕЏИТИ: ДУИ беше тематска партија, никогаш не се определи лево или десно. Ги нарекуваа лева партија поради политичкото потекло на првите луѓе на ДУИ, кои беа блиски идеолошки до Енвер Хоџа и поранешниот систем. Но, ДУИ беше склоп на левичари и десничари, интелектуалци… Беше флексибилно зависно од тоа со кој партнер ДУИ и Али Ахмети се во влада. Тоа се гледаше и во програмата, каде имаше и контрадикторности.
ФОКУС: Откако ДУИ ги доби последните избори со кампања за Албанец-премиер, после отиде во една друга насока, ребрендирајќи се во зелена партија. Како гледате на тоа?
МЕЏИТИ: Тогаш уште бев внатре, но тоа беше неочекувано, само од ПР аспект. За жал, главната задача и цел на ПР-агенцијата што работи за ДУИ е казино-бизнисот. Го изгубија тој бизнис во Албанија и Косово. Зборувам за Австриецот Питер и еден Израелец. Ним не им е грижа многу за идеологијата.
ФОКУС: Како се поврзани двете работи – ПР услугите за ДУИ и бизнисот со игри на среќа?
МЕЏИТИ: Ова им е параван, демек се занимаваат со ПР-от на партија, додека всушност 90 отсто од времето го губат на развој на казино-бизнисот. Тоа што го имаат изгубено во Косово и Албанија сакаат да го донесат тука, и во тоа се успешни.
ФОКУС: Имаат свое казино или…?
МЕЏИТИ: Имаат! Тоа им е главен бизнис, но одвреме-навреме испаѓаат со неочекувани идеи.
Замислете, излегува Ахмети да промовира зелена агенда после 20 години, а министерот за екологија не беше присутен на конференцијата?! И како се најави така заврши. Нема ништо од зелената агенда, бидејќи гледаме дека зборуваат за зелена агенда, а продаваат мазут.
ОБЕДИНУВАЊЕ НА ОПОЗИЦИЈАТА
ФОКУС: Дали работите и на партиска програма, со која би настапиле на изборите?
МЕЏИТИ: Краток период после нашето формирање, дојде до обединување на опозицискиот албански блок, што е нова вредност и ја носи конкуренција што досега недостигаше во албанскиот кампус. Во принцип, работиме и на подигнување на структурите на ДД, но и да се оформи и зајакне коалицијата. Веќе е договорено дека на следните избори ќе излеземе со заедничка листа со пратеници и програма.
ФОКУС: На што ќе се базира вашата понуда, која еве уште отсега е познато дека ќе биде заедничка? Кои ќе бидат главни точки?
МЕЏИТИ: Фокусот е на економијата, правниот систем, борба против корупција. Ќе покажеме дека нема да бидеме класична опозиција, само преку препукување и критики.
Власта, особено албанскиот дел, целосно заборави на програмата, ветувањата од 2020 година. Малку им беше тоа, па забегаа и влегоа да им штетат на граѓаните со бизнисот со казината, со лихварство преку брзи кредити. И во други делови забегаа и преминаа во мафијашки клан.
ФОКУС: Затоа ли вие ја употребувате фразата „сицилијански фронт“ за т.н. фронт за Европа што го промовира власта?
МЕЏИТИ: Па, ако се занимаваш со казино-бизнисот, лихварство, дрога, проституција, што те разликува?
Како што реков, ние нема да останеме само на дијагноза, туку ќе дадеме лек, со конкретни идеи и понуда. На пример, иако имаме 3 албански универзитети финансирани од државата, 30-40 отсто од најдобрите матуранти одат на УКИМ. Значи, не е постигната целта, нема доволно квалитет на тие универзитети. Имаме идеја од 3 да се направи 1 универзитет. Еден универзитет да биде чадорот на трите и тие да се ориентираат – еден за социјални, друг за природни, трет за технички науки.
ЕДНА СЛИКА, ИЛЈАДА ЗБОРОВИ
ФОКУС: Дали имате план во однос на правосудството, борбата со криминалот и корупцијата?
МЕЏИТИ: Работиме и на тоа. Основата на демократските и европски држави е правната држава, тоа е основа да има безбедност, инвестиции итн. Во таа насока, потребно е автономно финансирање на правосудниот систем, за да бидат понезависни и попрофесионални. Во судството и обвинителството има врвни професионалци кои со независно финансирање треба да излезат на површина.
ФОКУС: Кога зборуваме за овој сегмент, дали Ислам Абази е близок до ДУИ или не? Кога се брани дека оваа теза не е точна, ДУИ го вади аргументот дека го гласале обвинители од секаде и од сите етникуми.
МЕЏИТИ: Никој нема дилема дека е близок, туку прашањето е колку е близок? Има и слики, а една слика е илјада зборови. Има доста впечатливи слики. Лошото е во тоа што неговиот избор ги наведе да згрешат уште повеќе, се опуштија и се впуштија во работи кои не беа карактеристички за ДУИ во минатото и забегаа целосно. Абази беше избран под политички притисок. Имаше и реакции од САД, фелата.
ФОКУС: САД го стави на „црна листа“ струшкиот градоначалник Рамиз Мерко, бидејќи влијаел врз судството. Колку тоа ја компромитира ДУИ?
МЕЏИТИ: Прво, тоа го руши митот на ДУИ дека е гласноговорник на западниот свет. Второ, анкетите покажаа дека довербата во судството е на дното. Ова веќе е аларм за сите што сакаат да придонесат во оваа држава да има нормален систем и функционирање.
СЕ ПОМАЛКУ ДЕЦА И РАБОТНИЦИ
ФОКУС: Во делот на економијата, какви мерки и политики ќе предложите и застапувате?
МЕЏИТИ: Ненормална е оваа ситуација со алармантната миграција на младите во овие 2-3 години. Рапидно се намалува бројот на деца во училиштата, нема работноспособно население. Дојдовме во ситуација да носиме работници од надвор за градежништво и други струки. И владата не наоѓа потреба да го анализира овој проблем и да се донесе некои мерки.
Економските проблеми преовладуваат и нашиот фокус ќе оди да дадеме економски решенија и ќе се обидеме да ја спречиме миграцијата, да има работни места. Сега се случува луѓе да остават работно место и да бегаат во ЕУ, што кажува дека не е проблем невработеноста, туку животниот стандард. Како резултат на високата инфлација, растат трошоците, а платите остануваат исти, освен што растат за функционерите.
И во комунизмот и во текот на приватизацијата Албанците останаа надвор од економскиот систем. И во однос на владеењето, има многу битни институции што не се владеени од Албанците, а имаат влијание врз економскиот сектор, како што е УЈП, Царина.
ФОКУС: Да, но ДУИ за првпат има министер за финансии, кога веќе говориме за економијата. Покрај тоа, раководи со дипломатијата, Собранието…
МЕЏИТИ: Албанците не се за симболика, туку сакаат реална власт, да влезат во власта и да преземат одговорност, да понудат решенија за сите граѓани. Во минатото беше желба да имаме претседател на Собрание, но тоа веќе е надминато и отвораме други прашања. Зошто во овие 30 години никогаш немало директор на УЈП Албанец?
ФОКУС: Конкретно за УЈП, имало Албанци заменици-директори, од кои последниот на пример заврши во притвор.
МЕЏИТИ: Не зборуваме за заменици, тие по закон немаат овластување, ни заменици-директори ни заменици-министри. Тоа се политички функции за да се задоволат апетитите за повеќе партии во власта. Ние сме за суштинска власт. Зошто досега со МВР не раководел Албанец, освен технички? Зошто немало Албанец-директор на БЈБ, на АНБ?
ИЗБОРИТЕ ДА БИДАТ СПОЕНИ
ФОКУС: Дали очекувате и се подготвувате за споени или одвоени избори?
МЕЏИТИ: Во интерес на државата и во ваква економска состојба, мислам дека не треба да правиме дополнителни трошоци. Изборите да бидат заеднички, а нашата коалиција договорено е да настапи со заеднички листи, претседателски кандидат.
ФОКУС: Има ли конкретни имиња за кандидат за претседател околу кои правите анализи и сондажи?
МЕЏИТИ: Анализираме повеќе кандидати и од рамки на партиите и од надвор. Ќе биде заеднички компромисен кандидат, кој ќе ги претстави Албанците на најдобар начин и неговите гласови ќе бидат клучни.
ФОКУС: Можно ли е да се зголеми вашиот блок? Неколкупати го повикувате Таравари да ви се придружи, но тој засега останува дел од власта.
МЕЏИТИ: Ние ги повикуваме сите незаводоволни граѓани, интелектуалци, невладини организации, па и политички чинители. Наративот на Алијанса беше антидуи, дека треба нова политичка ера и сега е шансата да истапат од таму и да и се приклучат на опозицијата.
ФОКУС: Имате ли некаква комуникација и преговори со Алијанса на оваа тема?
МЕЏИТИ: Јас имам добри релации со речиси сите политички партии и во Собрание и надвор од Собрание разговараме за тоа што не тангира.
НАРОДОТ Е ЗА ПРОМЕНИ
ФОКУС: Нели го сметате за хендикеп тоа што првиот изборен настап ќе ви биде во коалиција, па нема да може самостојно да измерите колку тежите на политичкиот пазар?
МЕЏИТИ: А кој настапува самостојно? ВМРО оди со 20, СДСМ со 20 партии, ДУИ собира се и сешто. Приморани се и нивните најголеми противници и тие што ги исплукале и критикувале со години сега да им бидат партнери. Тогаш, која е логиката ние да настапиме сами?
Напротив, сакаме да донесеме конкуренција во албанскиот кампус, тоа недостигаше досега. Немаше силна опозиција како коректор, па се надминавме себе си и со добра понуда овојпат ќе донесеме и победа и нова ера на политичката сцена кај Албанците.
ФОКУС: Значи, вашата цел е да го поразите ДУИ, но се уште котира како водечка албанска партија на сите анкети. Како го толкувате тоа?
МЕЏИТИ: Не е работата ние што сакаме, туку на ДУИ му е поминат рокот. Но, ако седиме во канцеларија и пишуваме бројки секојдневно може да има смешни анкети. Мислам дека политичката ситуација е идентична со 2016 година. Веќе не можам да го препознаам ДУИ по притисокот што го прави. Освен што нас не разреши бидејќи размислувавме поинаку, одат до отпуштање од работно место, притисоци врз администрацијата, инспекции.
ФОКУС: Зборот ми беше дека многупати досега на ДУИ му предвидувале крај, но секогаш излегувал како победник.
МЕЏИТИ: Од 2002 до 2006 година, ДУИ победи како УЧК-БДИ. Од 2006 до 2012 година победуваше бидејќи од друга страна конкурент беше Мендух Тачи. Од 2012 досега, пак, народот е за промени. Некаде 60-70 отсто од гласовите се опозициски настроени, не беше проблем до народот и до способноста на ДУИ, туку до неспособноста и поделбата на опозицијата. Во 2016 година, да одеа заедно на избори Алијанса и Беса, ДУИ одамна ќе беше опозиција. Заради суети не се случи обединување, но овојпат нема лидер на опозицијата, секој е лидер во својата куќа.
ФОКУС: Зошто сте толку самоуверен дека овојпат нема повторно да се растури вашиот опозициски блок токму поради суети?
МЕЏИТИ: Треба реални да бидеме. ДД, Беса и Алтернатива произлегоа на некој начин од ДУИ, секој во различен период, но од идентични причини. Испаднаа од таму, но тој електорат е близок и може да се спои. Од друга страна, има една „европска коалиција“ која е присутна во црните листи, секој ден има коруптивни скандали и се само европска агенда не тераат. Но, таму се Алијанса и ДПА кои се контра, Алијанса и ДУИ кои војуваат, и таму има делови што одат од Беса, Алтернатива, „огнена група“. И ако на ова се надоврзат и препукувањата или различните размислувања внатре во ДУИ, тешко ќе биде.
СПОЈОТ СО ГРУЕВСКИ И МИЈАЛКОВ
ФОКУС: По се изгледа, чадорот на оваа хетерогена коалиција треба да биде интеграцијата кон ЕУ. Стравувате ли дека може да паднете во замката дека ако тие се продадат како фронт за Европа, тогаш тие што остануваат надвор се против Европа?
МЕЏИТИ: Една од причините зошто почна мојата битка е да се прекине владеењето со Никола Груевски во 2016 година. Затоа и платив цена, зашто се борев внатре во партиските тела со една мала група да се прекине со Груевски и да се почне со Зоран Заев, што после донесе до влез во НАТО. Така што и внатре во ДУИ бев дел од струјата што беше прозападна. Освен мене, Невзат Бејта, Теута Арифи, Висар Ганиу, сите други беа за продолжување на коалицијата со ВМРО-ДПМНЕ.
ФОКУС: И Ахмети ли беше за таа опција?
МЕЏИТИ: Владата што се направи после со СДСМ, со исклучок на Хазби Лика, сите беа вмровски настроени. Тогаш не ми беше јасно, но денес јасно ми е дека тоа било за да се одржи спојот со Груевски и Сашо Мијалков, да продолжат бизнисите, да им помогнат да избегаат од тука или ако се затворат да бидат онаму каде ќе имаат комоција. И ако ова беше нејасно досега, со последните изјави на Бујар Османи и владини претставници дека треба да се помириме со него, дека добро би било да се врати човекот зашто имал многу информации, иако тоа што со години седел надвор човекот, јасно е за спојот на ДУИ со Груевски.
И да потсетам дека пред 2 години да не беше Кастриот Реџепи и јас Македонија ќе имаше влада со Левица и тие ќе беа клучот на новата влада.
ФОКУС: Кога веќе го споменавте Реџепи, Села ве обвини дека сте го киднапирале. Точно ли е?
МЕЏИТИ: Се случило ли некогаш киднапираниот да остане со киднаперот? Немало такво нешто. Кастриот даде еден придонес Македонија да остане во евроатланскиот курс. Затоа, јасно е кој е европски, а кој не е европски фронт. Не може да биде европски фронт некој што злоупотребува европско знаме за казино-бизнис. Европски фронт им е параван за да крадат што можат.
ФОКУС: ВМРО-ДПМНЕ отворено вели дека ве посакува за постизборен партнер. Што мислите вие за ВМРО и можноста за влада со ВМРО?
МЕЏИТИ: ДУИ продолжува со Груевски. Што претставува Груевски веќе знаеме, што претставува новото ВМРО ќе видиме. Ние не се замараме со тоа, како ќе одлучат граѓаните Македонци ние не може да влијаеме. Но, можеме да кажеме дека првата точка на која ќе седнеме да разговараме ќе биде европската интеграција, уставните промени, па потоа за другите теми.
БРКААТ 80, А ИМ ВИСАТ 61
ФОКУС: Дали од ова може да се заклучи дека вие не верувате во уставни измени пред избори?
МЕЏИТИ: Не велам дека е невозможно, но тие што велат дека е возможно тоа го зборуваат 3 години. Зборуваат за 80 пратеници, а секогаш во прашање им се 61.
ФОКУС: Ахмети демонстрира оптимизам дека тоа ќе се заврши до ноември, исто како и другите владини коалициски партнери.
МЕЏИТИ: Ако не го каже тоа што ќе каже друго? Дека на секој агол отвориле казино, дека малку им се овие коруптивни зделки па треба да им влезат на граѓаните дома и преку онлајн-казино? Немаат што да кажат друго, освен „ќе биде“. Ако не го кажат и тоа треба да одиме на избори, а сакаат да купат уште малку време.
ФОКУС: Во пакет со внесот на Бугарите во Преамбулата барате замена на формулацијата „20 отсто“ со албански јазик. Ако зависи од вашите гласови, дали ќе ги подржите измените што произлегуваат од францускиот предлог без да биде исполнет другиот услов?
МЕЏИТИ: Кај Албанците нема дилема дека треба да се изгласаат уставните промени, и власт и опозиција сите се едногласни дека тоа е единствена алтернатива и перспектива. Но, Бугарите се услов за почеток на преговорите и ако остане на тоа – добро. Но, во Уставот по добра волја треба да се внесат и Црногорци, Хрвати, Израелци. Значи имало време за помали заедници, а не да се укине она понижувачко „20 отсто“ за втората најголема заедница.
Плус, со внес на нови 5 заедници задираме во еден механизам што ја спречи војната во 2001, а тоа е Бадентеровиот принцип. Во Комитетот за заедниците, кој на почеток беше предвидено да биде како втор дом на Собранието, има по 7 Албанци и Македонци и по еден од другите заедници, а сега ќе има уште 5. Идниот премиер, кој и да е, ќе рече во имам Бадентеровото мнозинство зашто имам Црногорец, Хрват. Се намалува улогата и вредноста на албанскиот глас и се враќа чувството за мајоризација, а тоа беше главната причина за 2001.
ФОКУС: Неодамна рековте дека добро би било да се направи заедница на албански општини, како што се бара во Косово за српските општини. Која би била целта на тој концепт, дали тоа ќе придонесе кон поголема децентрализација?
МЕЏИТИ: Децентрализацијата е еден до главните столбови на Рамковниот договор, но не може да ги затвориме очите и да не видиме дека Македонија е најцентрализирана држава во регионот. Само Кипар е поцентрализиран. Косово е многу напред и за фискална децентрализација. Владите сакаат да даваат ингеренции, но не и финансии. Во Европа општините се држави во држави, во Швајцарија државата поднесува барање до општините за капитални проекти. Само 3-4 отсто од ДДВ, данок на добивка оди за општините, а во Европа таа стапка оди до 30-40 за општините, кои се најблиска власт до граѓаните.
ТЕШКИ ОПОЗИЦИСКИ ДЕНОВИ
ФОКУС: Во изминатиот период јавно излеговте со изјава дека Османи имал средба со Груевски, а власта барала негова амнестија од Пендаровски. Сето ова го кажувате врз основа на информации или тоа повеќе претставува провокација?
МЕЏИТИ: За средбата кај Пендаровски, намерно само датумот не беше точен, и на некој начин претседателот тоа го потврди. Не беше за денот на ЕУ, туку за денот на НАТО. Највисоки претставници на ДУИ молеле да го вратат Груевски.
ФОКУС: На кои „највисоки претставници“ мислите?
МЕЏИТИ: Па кај претседателот на држава не оди претседател на огранок.
Во однос на моето прашање до Османи дали лично или семејно бил таму (во Будимпешта), пак го избегна одговорот. Случајно или не, сега истиот тој спрема терен за враќање. Во меѓувреме, се случуваат измени на Кривичниот законик, со што (на Груевски) му укинаа 70 отсто од предметите. Се случуваат турбуленции во Судски совет, па укинаа некои предмети за Мијалков. Сакаат да носат Закон за амнестија. Има и силни притисоци во Врховниот суд да се прифати аболицијата на поранешниот претседател Иванов. Цел овој комплекс на чудни случувања, заткулисни игри одат во прилог на тоа.
ФОКУС: Последно велите дека може да го вратат на денот на ВМРО. Од каде тоа?
МЕЏИТИ: Поставив такво прашање, дали ќе го вратат како херој на 23 ноември, на Денот на ВМРО? И мислам дека веќе само ги лажат странците дека работат на уставните промени. Овие работат како да излезат од ситуацијата, зашто јасно им е дека ги губат изборите, дека ги чекаат тешки денови во опозиција, и се спремни дури да се молат и на Груевски за да излезат од калта. Го враќат за дневна политика, да наштетат на ВМРО.
ДА ИМАВ ЛИДЕРСКИ АМБИЦИИ, ЌЕ ГИ ПОКАЖЕВ ОВИЕ 20 ГОДИНИ!
ФОКУС: Зошто цела „огнена група“ не остана на купче?
МЕЏИТИ: Од 2020 јас сум конзистентен. Јас сум редок случај да преминам од влада до опозиција заради убедување. Имав простор како потпретседател, шеф на парламентарна група, претседател на огранок во Чаир. Да беше до мои лични интереси и кариера, имав доволно простор за себе.
Но за разлика од нив, јас немам изгубено контакт со реалноста, комуницирам со членството. За време на корона кризата водевме кампања, тие не поддржаа и не гласаа и по цена на живот и зараза, и да заборавиш на се кон нив. Мојата интуиција ми велеше дека ДУИ е забегана во работи кои не можевме да ги замислиме.
Заради моите критики си ја платив цената, не бевме разрешени туку избркани. Дојдовме до точка да си одиме дома или да ја продолжиме битката и тука се 99 отсто од луѓето на тие митинзи и јавни настапи. На тие што се вратија ќе им се заблагодарам за придонесот.
ФОКУС: Дали секогаш сте имале желба да бидете лидер на ДУИ или на друга партија, како сега?
МЕЏИТИ: Да имав таква желба ќе го искажев тоа, немаше да го кријат 20 години додека бев во ДУИ. Напротив, никогаш не сум претендирал за ова. Причината зошто работиме на спојување на опозицијата покажува дека не ни е по секоја цена лидерството или кој ќе го има знамето. Се надминавме, направивме силен опозициски блок, без предрасуди.
ФОКУС: Има ли патрон вашето обединување? Многумина прават анализи дека Албин Курти е кумот на тој проект.
МЕЏИТИ: Освен внатрешните прашања во кои се разидваме со ДУИ, ние сме против „Отворен Балкан“, особено сега откако и Еди Рама се повлече, па останаа само Ахмети, Ковачевски и Вучиќ. Да направиш „Отворен Балкан“ со блиски соработници на Милошевиќ, како Вучиќ, Дачиќ, Вулин, со единствена држава во Европа која се уште не воведе санкции кон Русија и соработуваат со Путин… Не знам што ги држи во тоа, но ние сме за Берлинскиот процес, што не го гледа Косово како проблем, туку тие што се проблем, односно краците од октоподот на Путин.
АКО ПОРАНО ИМАШЕ ДИЛЕМИ, ВЕЌЕ ЈАСНА Е УЛОГАТА НА ГРУБИ
ФОКУС: ДУИ веќе 20 години е на власт, па доколку испаднете во право и по изборите замине во опозиција, што ќе се случува со партијата?
МЕЏИТИ: Има мит за ДУИ, но да не заборавиме дека 2014-2016 ДУИ имаше 153 илјади гласови, но падна на 80 илјади гласови за 2 години. Имајќи во предвид дека тогаш кампањата беше антидуи, но не во вакви размери и не се чепкаше лидерот на ДУИ, оваа ситуација дефинитивно ќе се одрази во ДУИ, зашто реалните и искрени гласачи не можат да препознаат на какво дереџе падна ДУИ по паметот на Груби и другите, кои не се врзани идеолошки, не се основачи.
ФОКУС: Ахмети често правел компромиси, порано го жртвуваше Муса Џафери, зошто истото не го направи со Груби и реши да плати одредена политичка цена?
МЕЏИТИ: Мислам дека веќе и да сака не може. Ако имаше дилеми до пред 5-6 месеци, веќе нема дилеми. Ваква корупција во вакви размери – јасно е зошто Груби има такво влијание и дојде на таква позиција. Затоа мислам дека веќе и да сака Ахмети не може.
„БАУЕР“ ГО РЕНОВИРА И ОБЈЕКТОТ НА ИСЛАМ АБАЗИ
ФОКУС: Од ДУИ побараа надлежните да испитаат како милионски средства од Општина Чаир се одлеале кон градежната „Бауер БГ“ и една нивна сестринска фирма. За што се работи?
МЕЏИТИ: Се работи за проект пред повеќе од 10 години, за плоштад Скендер-бег. Парите ги пушта владата на наменска сметка во Чаир како наменски средства кои не можат да се искористат за нешто друго и на тендерот тогаш добива „Бауер“. Ако е проблем, прашувам зошто и оваа година има 6 тендери добиено од МОН каде е кадар на ДУИ? Плус, 6 милиони евра имаат добиено од владината служба за општи и заеднички работи. Дополнително, го реновираат и објектот на Ислам Абази.
БЕЏЕТИ БЕШЕ ЛИНКОТ СО АРСОВСКА, ЧОВЕК НА ГРУЕВСКИ ВО „КОМУНАЛЕЦ“
ФОКУС: Како дојде до соработката меѓу вас и скопската градоначалничка Данела Арсовска?
МЕЏИТИ: Линкот беше Блерим Беџети и сега веќе немаме соработка, таа е само со Беџети, Левица, пипци на Груевски. Две јавни претпријатија се на луѓе од Сарај. Има најави дека на „Комунална хигиена“ ќе постави човек на Груевски. Ние соработувавме со Арсовска заради интересот на граѓаните, локалните проблеми се заеднички, има испреплетени ингеренции.