АлсатМ објави дека вечерва во Владата поминал предлог-законот за употребата на албанскиот јазик. Меѓу другото, во одобрената верзија се предвидува двојазичност на униформите на полицијата, пожарникарите и здравствените работници во општините со најмалку 20% Албанци, како и во Градот Скопје.
Предлог-закон за јазикот:
За двојазичност на униформите на Армијата ќе се бара мислење од Венецијанската комисија. Исто така, законот предвидува парите и поштенските маркички да содржат симболи значајни за Македонците и за Албанците.
„Книжните и кованите пари како и поштенските марки ќе содржат симболи што го претставуваат културното наследство на граѓаните што го зборуваат македонскиот јазик и неговото кирилско писмо и јазикот што го зборуваат најмалку 20% од граѓаните и неговото писмо.“
Ова значи дека не се предвидува албанскиот да се користи и на парите, туку само на нив да се аплицирата елементи значајни за Албанците. Според нашите информации, за разлика од Уставот, во законот експлицитно се наведува терминот „албански јазик“. Имено, во Уставот актуелно не се споменува албанскиот јазик, туку само формулацијата „јазик што го зборуваат најмалку 20% од граѓаните“. Во членот 1 од законот се наведува:
Член 1
На целата територија во Република Македонија и во нејзините меѓународни односи службен јазик е македонскиот јазик и неговото кирилско писмо.
Друг јазик што го зборуваат најмалку 20% од граѓаните (албански јазик), исто така е службен јазик и неговото писмо, согласно овој закон.
Исто така, се предвидува граѓаните да имаат право да употребуваат било кој од наведените службени јазици и нивните писма. Институциите ќе имаат обврска да им овозможат на граѓаните да ги користат и применуваат тие службени јазици. Инаку, предлог-законот е можно веќе утре да биде испратен во парламентарна постапка.