ДУИ вчера донесе одлука да оди во влада со СДСМ откако како што рекоа ги исцрпиле сите опции во дискусијата на Централното претседателство. По донесување на одлуката, Али Ахмети во изјава за Телевизија 24 рече дека сега треба да се разгледаат сите аспекти на Уставот и на деловникот на Собранието во однос на изборот на новата влада.
-Прашањата за избор на влада во Собранието и за негов претседател ги регулира Уставот и деловникот на Собранието и тие треба да се разгледаат. Сите што ја дале поддршката за новиот мандат тоа го направиле со слободна волја и не верувам дека некој ќе се повлече, рече Ахмети.
Тој истакна дека ДУИ не тактизирала во однос на донесувањето на одлуката да поддржи влада предводена од СДСМ, зашто, како што рече, во меѓувреме се воделе дебати по разни прашања и смета дека локалните избори не треба да се одложат и треба да се одржат во мај.