Украинскиот претседател Володимир Зеленски категорично ја отфрли можноста украинските сили да се повлечат од Донбас како дел од потенцијален мировен договор со Русија, предупредувајќи дека таквиот потег нема да донесе траен мир, туку само ќе создаде услови за нова руска офанзива.
Во интервју за данскиот јавен сервис ДР, Зеленски порача дека откажувањето од териториите што сè уште се под украинска контрола би претставувало сериозна стратешка грешка.
„Ако зависи од мене, тогаш не, нема да го напуштам Донбас“, изјави украинскиот претседател.
Тој нагласи дека не верува оти рускиот претседател Владимир Путин би се задоволил со преземање на целосна контрола врз Донбас, оценувајќи дека Москва би можела да го искористи евентуалното примирје за подготовка на нови воени операции.
Според украинскиот претседател, територијалните отстапки не претставуваат гаранција дека војната ќе заврши.
Тој смета дека Русија би можела привремено да ги запре борбените дејства, а потоа повторно да продолжи со воените операции против Украина.
Поради тоа, Зеленски инсистира дека секој евентуален мировен договор мора да содржи цврсти безбедносни гаранции што ќе спречат повторување на руската агресија.
Украинскиот претседател смета дека најреалниот пат кон прекин на војната е задржување на постојните позиции на фронтот и започнување преговори, наместо повлекување на украинските сили од териториите што ги контролираат.