Поранешната Мис на Швајцарија и манекенка Беатрис Кеул го обвини американскиот претседател Доналд Трамп за силување, тврдејќи дека нападот се случил во хотелот „Плаза“ во Њујорк, во ноември 1993 година. Нејзините обвинувања се содржани во извештајот што демократите во Претставничкиот дом на САД го објавија во понеделникот.
Кеул и претходно изнесувала тврдења поврзани со истиот инцидент. Во октомври 2024 година, таа тврдеше дека Трамп ја допирал на несоодветен начин, но тогаш изјави дека немало понатамошен напад.
Во разговорите со вработените во комитетот на демократите, манекенката сега изнесе посериозни обвинувања. Според нејзиниот исказ, Трамп ѝ го скинал фустанот, ѝ нанел повреди и ѝ се заканувал за да ја принуди да молчи за инцидентот. Според неа, таа го запознала Трамп на 24-годишна возраст, на прес-конференција организирана по повод натпревар за доделување награди во хотелот „Плаза“, кој во тоа време бил во негова сопственост.
Кеул изјави дека Трамп ѝ ветил помош околу добивањето виза и запишувањето на Универзитетот во Њујорк. По нивниот разговор, Џефри Епстин, осуден сексуален престапник, ѝ пристапил и ја поканил на забава во резиденцијата на Трамп, „Мар-а-Лаго“.
Белата куќа ги отфрли обвинувањата во извештајот, велејќи дека демократите се обидуваат да го одвлечат вниманието од резултатите на администрацијата на Трамп. Трамп претходно негираше какво било лошо однесување со Епштајн и тврдеше дека го прекинал пријателството со него долго пред да се појават сомневања за неговите криминални активности.
Извештајот на демократите, исто така, вклучува сведочење на уште четири жени кои го обвинија Трамп за силување или сексуален напад. Документот, исто така, се осврнува на обвинувањата дека Трамп, Епштајн и други користеле натпревар во хотелот „Плаза“ за да пронајдат ранливи млади жени и девојки. Членот на Комитетот, Џејми Раскин, рече дека пет жени директно го обвиниле Трамп за силување или сексуален напад во друштво или присуство на Епштајн. Други жени, според извештајот, тврделе дека Епштајн или неговата соработничка Џилијан Максвел се обиделе да ги доведат во контакт со Трамп.
Раскин, исто така, го обвини Министерството за правда на САД за прикривање злосторства за да го заштити претседателот, додека Белата куќа повторно ги отфрли обвинувањата во извештајот.