Дваесет и четиригодишен британски турист починал од тешка алергиска реакција на кикирики откако изел чурос во Буенос Аирес, иако вработените во кафулето претходно му потврдиле дека слаткиот десерт не содржи јаткасти плодови.
Деталите за смртта на Хари Кит од Фалмут, кој бил на патување во Јужна Америка, беа изнесени на истрагата во Корнвол, пренесува Би-Би-Си.
На 30 октомври 2025 година, Кит доживеал анафилактички шок веднаш откако пробал чурос. Пред судот било изнесено дека, пред да нарача, тој ги прашал вработените – и на англиски и на шпански јазик – дали печивото содржи кикирики, на што добил одговор дека не содржи.
Тој патувал со својата девојка Наоми Пај, а претходно јадел чурос во Мексико и Перу без никакви проблеми.
Неговата девојка сведочела дека Кит веднаш почувствувал присуство на јаткасти плодови. Тие тргнале со метро кон местото каде што престојувале, но неговата состојба нагло се влошила. Усните почнале да му отекуваат и тешко дишел.
Пај повикала брза помош, побрзала да земе „ЕпиПен“ (автоинјектор со адреналин) и му вбризгала адреналин во бутот, непосредно пред да пристигне медицинскиот тим. Таа нагласила дека вработените „категорично им потврдиле“ оти во чуросот нема јаткасти плодови.
Во болницата, срцето на Кит престанало да чука во траење од 11 минути. Лекарите успеале да го реанимираат и го префрлиле на одделението за интензивна нега. Тој починал една недела подоцна како последица на анафилактички шок и хипоксично оштетување на мозокот предизвикано од недостаток на кислород.
За време на истрагата, било утврдено дека таткото и братот на Кит подоцна го посетиле истото кафуле. Нарачале иста храна и повторно ги прашале вработените дали содржи кикирики. Еден келнер рекол дека не знае, додека друг тврдел дека тој не бил таму во тоа време. Примерок од храната бил однесен во локална лабораторија на анализа, при што тестовите покажале дека чуросот содржел 20 мг протеин од кикирики на еден килограм.