САД денеска извршија напади врз мостови и аеродром во Иран, додека Техеран возврати со напад врз постројка за производство на електрична енергија и десалинизација на вода во Кувајт, со што се зголемува ризикот од натамошна ескалација на конфликтот преку проширување на целите кон клучната инфраструктура.
Во спорниот теснец Хормуз, каде што обновениот конфликт повторно го попречи глобалното снабдување со енергенси од Блискиот Исток, американски маринци се качија на еден танкер, додека за друг брод беше јавено дека е погоден од ракета, пренесе Ројтерс.
Друг брод беше пресретнат од вооружени лица во близина на брегот на Јемен, но извор од секторот за поморска безбедност изјави дека инцидентот веројатно е дело на сомалиски пирати, а не настан поврзан со конфликтот меѓу Иран и САД.
Вашингтон и Техеран ги испитуваат границите на ескалацијата откако минатата недела пропадна договорот за прекин на огнот, што ја зголемува можноста за враќање кон отворена војна.
Американскиот претседател Доналд Трамп се закани со опсежни воздушни напади врз иранската инфраструктура и не ја исклучи можноста за копнен напад врз иранскиот брег или острови. Американски официјални лица изјавија дека нападите врз јужен Иран делумно имале за цел да му обезбедат на Трамп повеќе воени опции.
Ваквите потези носат ризик дека Иран ќе возврати со напади врз виталната инфраструктура на ранливите соседни арапски држави, или дека неговите сојузници во Јемен дополнително ќе го попречат глобалното снабдување со енергенси преку напади врз бродови во Црвеното Море.