Украина денес објави дека нејзината армија погодила железнички мост, електрана и други инфраструктурни цели во Крим, кои Киев планира, како што тврдат официјалните лица, да ги „изолира со беспилотни летала“.
Министерството за одбрана соопшти дека беспилотните летала погодиле складиште за нафта во термоцентралата Керч во источен Крим, трафостаница на запад и станица за дистрибуција на течен природен гас во Симферопол, вториот по големина град на полуостровот.
Единиците за специјални операции објавија дека во соработка со, како што е наведено, движењето на отпорот во Крим, го уништиле железничкиот мост над Севернокримскиот канал, во близина на селото Роздолне.
Украинскиот министер за одбрана Михајло Федоров минатата недела изјави дека „се чини дека Крим ќе стане остров во блиска иднина“.
„Тоа би можело да доведе до некои многу неочекувани последици за Русите“, рече Федоров на YouTube каналот на блогер, осврнувајќи се на операциите на Украина на полуостровот.
Делови од Крим денес останаа без електрична енергија, објави локалната енергетска компанија, која сепак го припиша тоа на „технички дефекти“ во локалните електрични мрежи и додаде дека очекува електричната енергија да биде обновена во рок од 24 часа.
Во врска со примирјето со Русија, амбасадорот на Украина во Обединетите нации (ОН), Андреј Мелник, вчера изјави дека Киев е сè уште подготвен за директни разговори со Москва со цел да се постигне „праведен и траен мир“ врз основа на Повелбата на ОН, но предупреди дека подготвеноста на неговата земја за компромис не е бесконечна.
Мељник на состанокот на Советот за безбедност на ОН рече дека прекинот на огнот по сегашната линија на фронтот веќе претставува голема отстапка и ја повика Русија да се повлече од окупираната украинска територија.
Од друга страна, рускиот министер за надворешни работи Сергеј Лавров денес изјави дека Кремљ е подготвен да „ја обезбеди безбедноста“ на својот сосед и сојузник Белорусија, неколку дена откако украинскиот претседател Володимир Зеленски побара Минск да ја отстрани релејната опрема од својата територија, за која Киев тврди дека им помага на руските напади.
Лавров за руската новинска агенција Интерфакс изјави дека Киев се обидува да ја вовлече Белорусија во конфликтот, иако Кремљ ја користи територијата на таа земја за своите напади врз Украина.