Авионот со кој Фон дер Лајен патуваше до Пловдив (Бугарија) во неделата попладне остана без електронски помагала за навигација кога се приближи до пистата. Тројца службеници запознаени со инцидентот потврдија дека случајот се третира како руска операција на попречување.
„Целата област на аеродромот остана без GPS“, рече еден од нив.
По речиси еден час кружење, пилотот одлучи рачно да го слета авионот, користејќи аналогни карти.
„Беше јасно дека станува збор за намерно мешање“, додаде тој.
И Кремљ и Европската комисија беа замолени за коментар, додека бугарскиот орган за контрола на воздушниот сообраќај го потврди инцидентот за Фајненшл тајмс.
„Од февруари 2022 година, видовме значително зголемување на попречувањето на GPS-от, а неодамна и на лажирање на сигналот. Ваквите напади ја нарушуваат прецизноста на приемот на сигналот, што предизвикува бројни проблеми во работењето на авионите и копнените системи“, објави институцијата.
GPS блокирањето и лажирањето, кое го оневозможува или нарушува пристапот до сателитска навигација, некогаш беше резервирано за воени и разузнавачки цели за заштита на чувствителни локации. Сепак, во последниве години, земји како Русија сè повеќе го користат за нарушување на цивилниот живот.
Владите на земјите-членки на ЕУ веќе предупредија дека растечкиот број инциденти со GPS блокирање, за кои се обвинува Русија, се заканува да предизвика голема воздушна несреќа бидејќи во суштина ги „заслепува“ патничките авиони во лет.
Ваквите случаи бележат нагло зголемување во последните години во областа на Балтичкото Море и земјите од Источна Европа во близина на Русија, што влијае не само на авионите, туку и на бродовите и цивилите кои користат GPS на дневна основа.
Фон дер Лајен долета од Варшава за Пловдив, каде што се сретна со бугарскиот премиер Росен Жељазков и посети фабрика за муниција. Посетата е дел од нејзината турнеја низ земјите на фронтовската линија, со цел зајакнување на одбранбената подготвеност на ЕУ како одговор на руската агресија врз Украина.
„Путин не се променил и нема да се промени“, изјави Фон дер Лајен за новинарите во Бугарија.
„Тој е предатор. Може да биде запрен само со силно средство за одвраќање“ рече таа.