Здружението на новинарите на Македонија (ЗНМ) го осуди денешниот брутален вербален напад во Собранието на Република Македонија на претседателот на Демократската партија на Албанците Мендух Тачи врз новинарот на дневниот весник Коха, Арбен Зеќири.
– Тачи денеска пред средбата со евроамбасадорот Аиво Орав во пратеничката група на ДПА во присуство на други новинари го обвини Зеќири дека стои зад критичните текстови објавени во еден локален портал од Тетово. Освен тоа Тачи се пофали дека овие сознанија ги добивал од личниот фејсбук профил на новинарот, кој успеал претходно да го пробие и да има увид во неговата лична комуникација – велат од ЗНМ.
ЗНМ смета дека однесувањето на првиот човек на ДПА е случај без преседан во македонската демократија, еден ден по објавување на извештајот за напредокот на Македонија, кој е многу критичен во однос на слободата на изразувањето.
– За нас вербалниот напад врз Зеќири покажува под каков притисок работат македонските новинари, кои ја критикуваат работата на политичарите. Ова е само уште еден обид за заплашување на новинарите и девалвирање на улогата на медиумите во едно демократско општество. Го повикуваме јавно Тачи да и објасни на јавноста како успеал да изврши упад во личниот фејсбук профил на новинарот Зеќири, а надлежните институции да се заинтересираат за случајот со цел да се тргне сомнежот дека политичарите ги следат критичните новинари – коментираат од ЗНМ.