Голем дел од сопствениците на објекти на Кожуф се жалат дека инвестирале огромни суми на пари во угостителски објекти, вили или апартмани, но поради нерасчистениот пат тие биле затворени и пропаѓале.
Фудбалерот Горан Мазнов ги вложил своите финансии заработени од фудбалот во угостителски објект, односно мотел од 600 метри квадратни, со девет апартмани и една вила. Сепак, не можел да ги посети бидејќи патот, и по сите негови обраќања до ,,Македонија пат’’ и до фондот за патишта, останал нерасчистен.
-Секоја години исто зборуваме. Со години не сум видел некаква машина да работи на патот до скијачкиот центар. На околу пет места патот е пропаднат токму поради тоа што не се расчистува. Секој ден по еден камен да се подигаше, сега патот ќе беше чист – тврди тој.
Ѓорѓи Фидановски, исто така имал угостителски објект со 12 апартмани. Вложил многу, а апартманите пропаѓале затворени.
-Девет години трпиме штети. Прво имавме опструкции со стујата. Тој проблем се надмина, а сега продолжува проблемот со нерасчистениот пат. Пропаѓа целата инфраструктура на скијачкиот центар поради негрижата на институциите – вели тој.
Голем број на граѓани во минатото купиле плацеви, со цел да изградат угостителски објекти или викендички, но непроодниот пат не дозволувал да започнат со изградба на планираните објекти. И покрај големиот туристички потенцијал, ски центарот никако да започне да функционира. Затоа сопствениците во очај, се решиле да ги алармираат медиумите, надевајќи се дека нивната порака ќе допре до надлежните и конечно ќе се превземат мерки за решавање на нивниот проблем.
Директорот на „Македонија пат“, Гајур Кадриу, во телефонски разговор за регионалната телевизија КТВ изјави дека патот до скијачкиот центар е лошо трасиран и поради тоа истиот е проблематичен. Што се однесува до расчистувањето на снегот, нагласи дека нивна механизација интервенирала на 10 и 11 март. Снегот бил расчистен до рампата за влез во центарот, бидејќи до таму имале налог да расчистуваат.