Скопската Клиника за Гинекологија ја тужи поранешната директорка Марија Хаџи-Лега за злоупотреба на службената положба, односно според нив, таа ја оштетила клиниката за 150 илјади евра за набавка на тестови за дигитална кариотипизација со кои се испитуваат аномалии на плодот, дознава „Фокус“ од свои извори во Клиниката.
Според нашите информации, тужбата против Хаџи-Лега е поднесена пред речиси еден месец, на 16 декември, лани откако, претходно на 23 ноември, 2017 година, дисциплинска Комисија за утврдување на факти проценила дека нема потреба од набавка на 312 тестови, од кои само еден чини 25.500 денари.
Исто така, заклучокот на комисијата е дека со набавката на тестовите не е запознаен Стручниот колегиум, како и тоа дека не е изготвена програма кој ќе работи со тие тестови.
Нашите извори уште додаваат дека такви тестови се направени на 22 пациентки, без согласност на брачните парови, кои според протоколот мора да бидат запознаени. Сепак, истите тие пациентки не добиле резултати бидејќи нема кој да ги прочита, па со оглед на тоа не можат да се фактурираат од Фондот за здравство. Нивниот рок на траење е до март, а во упатството пишува дека се користат за истражувачки потреби, но и не за поставување на дијагноза.
Ваквците информации на „Фокус“ ги потврди и новата директорка на Клиниката за Гинекологија, Викторија Јовановска која додаде дека на тој начин клиниката е оштетена за 150 илјади евра.
Се потрудивме да стапиме во контакт и со поранешната директорка Хаџи-Лега за да ја прашаме дали била повикана на разговор во Јавното обвинителство и зошто клиниката имала потреба од тие тестови, со кои немало кој да работи, но таа не одговори на нашите телефонски повици и смс пораки.
И.М.