Деца од Кавадарци и околните места вчера го преплавија лизгалиштето на мраз, кое започна со работа.
Сместено на тениските терени кај спортската сала ,,Јасмин” тоа е одлична можност за рекреација во зимските денови, посебно за време на школскиот распуст.
Работи од 9:00 часот наутро, па се до полноќ, а во вечерните часови најчесто го посетуваат повозрасни љубители на лизгањето на мраз.
За користење на лизгалиштето и изнајмување на лизгалки се плаќа влезница, но во текот на денот бесплатно го користат учениците во рамките на програмата за физичко воспитување.
Со цел сите деца да ја почувствуваат зимската радост на лизгалки, локалната самоуправа во текот на наредната недела организира бесплатен превоз и бесплатно користење на лизгалиштето за децата од Ваташа, Сопот, Марена, Глишиќ, Дреново и Возарци.
Децата организирано ќе тргнуваат од училиштата со автобус, а потоа организирано ќе бидат вратени назад.
Лизгалиштето функционира од лани, во соработка на општината и компаниите донатори ,,Црна Река Петрол” и ,,Кожувчанка”.
Вики Клинчарова