Воени судири долж границата меѓу Ерменија и Азербејџан се забележани доцна во ноќта. И двете страни се обвинуваат меѓусебе која земја прва отворила оган. Засега само министерството за одбрана на Азербејџан соопшти дека им загинале војници во новите гранични судири.
„Во вторникот во 00:05 часот (по Гринич), Азербејџан започна интензивно гранатирање, со артилерија и огнено оружје од голем калибар, против ерменските воени позиции во правец на градовите Горис, Сотк и Џермук“, соопшти ерменското Министерство за одбрана. Во соопштението се вели дека Азербејџан користел и беспилотни летала.
Но, Министерството за одбрана на Азербејџан ја обвини Ерменија за „големи субверзивни акти“ во близина на областите Дашкесан, Келбајар и Лачин на границата, додавајќи дека нејзините армиски позиции „биле под оган, вклучително и од минофрлачи од ровови“.
„Има загуби меѓу азербејџанскитe војници“, се вели во извештајот, без да се наведат бројки.
Соединетите Држави повикаа на прекин на конфликтот, при што државниот секретар Антони Блинкен рече дека САД се „длабоко загрижени“ поради ситуацијата, вклучително и „пријавените напади врз населбите и цивилната инфраструктура“ во Ерменија.
„Апелираме веднаш да се стави крај на какви било воени непријателства“, рече Блинкен.
Минатата недела Ерменија го обвини Азербејџан дека убил еден од своите војници во престрелка на границата.
Во август, Азербејџан соопшти дека бил убиен војник, а армијата на Карабах соопшти дека двајца нејзини војници биле убиени, и десетина биле ранети.
Соседите водеа две војни – во 1990-тите и во 2020 година – за регионот Нагорно-Карабах, азербејџанската енклава населена со Ерменци.
Шест недели борби во есента 2020 година однесоа повеќе од 6.500 животи и завршија со прекин на огнот со посредство на Русија.
ЕУ ќе посредува во разговорите меѓу Ерменија и Азербејџан
Според договорот, Ерменија отстапи делови од територијата што ја контролираше со децении, а Москва распореди околу 2.000 руски мировници за да го надгледуваат кревкото примирје.
За време на разговорите со посредство на ЕУ во Брисел во мај и април, азербејџанскиот претседател Илхам Алиев и ерменскиот премиер Никол Пашинјан се согласија да „унапредат дискусии“ за идниот мировен договор.
Етничките ерменски сепаратисти во Нагорно-Карабах се отцепија од Азербејџан кога се распадна Советскиот Сојуз во 1991 година. Конфликтот што следеше однесе околу 30.000 животи.