Враќањето на Доналд Трамп во Белата куќа може да има „големо влијание“ врз војната во Украина, предупреди украинскиот претседател Володимир Зеленски, на помалку од една година до претседателските избори во САД.
„Ако политиката на следниот претседател, кој и да е тој, биде различна кон Украина, постудена или поштедлива, тогаш мислам дека овие сигнали ќе имаат силно влијание врз текот на војната“, рече Зеленски на големата годишна прес-конференција.
Зеленски оцени дека Доналд Трамп е „поинаква личност“ од Џо Бајден и дека затоа ќе има „поинаква политика“. Сепак, украинскиот претседател се надева дека ќе се задржат главните карактеристики на американската политика кон Киев, пренесува агенцијата Франс прес.
Американските претседателски избори ќе се одржат во ноември следната година, а многу набљудувачи веќе ги сметаат за декларација за континуираната поддршка на Западот за Украина. Намалувањето на американската поддршка за Украина би можело да влијае и на онаа на Европската унија, која „сигурно нема да има позитивен ефект врз Украина“, смета украинскиот претседател.