Украинскиот претседател Володимир Зеленски денеска изјави дека Киев бил погоден преку ноќ од еден од најтешките напади од почетокот на војната, додека Русија употребила повеќе од 440 дронови и 32 ракети во масовна офанзива.
Зеленски објави на „X“ дека биле нападнати и регионите Одеса, Запорожје, Чернигов, Житомир, Кировоград, Николаев и Киев.
Зградите во осум области на Киев се оштетени, а спасувачките екипи бараат преживеани под урнатините на станбена зграда.
– Сè уште не е јасно колку луѓе се заробени. Русите уништија цел дел од зградата, рече Зеленски.
Според моменталните податоци, најмалку 15 лица се убиени, а 75 се повредени.
– Сите повредени ја добиваат потребната помош, додаде украинскиот претседател.
Зеленски ги нарече нападите „чист тероризам“ и ги повика меѓународните партнери, вклучувајќи ги САД и Европската Унија, да реагираат порешително.
– (Рускиот претседател Владимир) Путин ја продолжува војната затоа што верува дека може да си ја дозволи. Светот не смее да се прави слеп. Терористите мора да ги трпат последиците, а не невините цивили, рече Зеленски.