Украинскиот лидер Володимир Зеленски ги повика западните поддржувачи да распоредат свои проектили во земјата како дел од „пакетот за одвраќање“ дизајниран да ги загрози руските воени цели.
Зеленски пред Европскиот совет го претстави својот таканаречен „план за победа“. Еден ден претходно во украинскиот парламент тој го обелодени планот, нарекувајќи го „сеопфатен ненуклеарен пакет за стратешко одвраќање“, без да даде детали.
-Предлагаме да се стави на украинска територија пакет за одвраќање што или ќе ја принуди Русија да учествува во вистински мировни преговори или ќе дозволи уништување на нивните воени цели – им рече Зеленски пред пратениците во Брисел.
Тоа е пристапот за мир преку закани… се работи за соодветен ракетен пакет, објасни Зеленски, додавајќи дека Киев им дал детали за планот на сите партнери кои можат „да го направат ова“, вклучувајќи ги САД, Франција, Германија, Велика Британија и Италија.
Тој, исто така, ги повтори своите барања за поголема воена поддршка од Западот и укинување на ограничувањата за употреба на западно оружје со долг дострел, и побара од странските поддржувачи на Киев „што е можно поскоро да ја засилат Украина со воздушна одбрана“.
Главниот помошник на украинскиот лидер, Михаил Подолијак, рече дека необјавениот дел од планот ги вклучува целите на Киев за напади на руска територија и список со желби за оружје.
„Планот за победа“ на Украина наиде на различни реакции кај западните партнери. Претставничката на Вашингтон во НАТО, Џулијан Смит, истакна дека пристапувањето во воениот блок не е „краткорочна“ работа. Генералниот секретар на НАТО, Марк Руте, исто така, рече дека нема гаранции Украина да стане следната членка на организацијата.
Портпаролката на руското Министерство за надворешни работи, Марија Захарова, го отфрли „планот за победа“ на Зеленски како „план за несреќата на Украина“, нарекувајќи го „збир на некохерентни слогани“ и „крвава пена на усните на неонацистичкиот убиец“.
Портпаролот на Кремљ, Дмитриј Песков, исто така, ја осуди шемата како само патоказ за продолжување на конфликтот меѓу Русија и Украина, и инсистираше на тоа дека единствениот начин да се постигне мир е Зеленски да се „отрезни“ и „да размисли за причините што доведоа до Конфликтот во Украина“.