Над 6.000 тркачи вчера учествуваа на 17-то издание на Виз Ер Скопски маратон. Учесниците кои беа пријавени на маратонот, полумаратонот и штафетниот маратон –ЕУ стартуваа во 8:00 часот, а трката на 5 км започна во 8:10 часот.
Стартот и целта на овогодинешниот маратон беше од платото пред Спортски центар Борис Трајковски, а патеката по која трчаа учесниците остана иста како и минатите години.
Беа срушени машкиот и женски рекорд на маратонот, и победата отиде кај Дарио Ивановски од машка и Андријана Поп-Арсова од женска конкуренција.
Ивановски пристигна до целта со време од 02:21:27, со што го сруши македонскиот рекорд и го постави новиот рекорд на Виз Ер Скопскиот маратон, второто место го освои Младен Стевановиќ, со време од 02:34:54, а на третото место се најде Давид Перлиќ, кој патеката ја истрча за 02:38:26.
Поп-Арсова пак, маратонот го истрча за 02:40:36 и го сруши досегашниот македонски рекорд во женска конкуренција на маратонот, второпласирана е Силвија Александра Паредер Јукаила, со време од 02:43:43 и третото место го освои Весна Кираџиева со време од 03:23:42.
Градоначалникот на Град Скопје, Петре Шилегов, ги додели наградите на прво пласираните на маратонот и се заблагодари на целата организација и волонтерите.
Покрај позитивната енергија и доброто расположение кое владееше за време на настанот, се случија и неколку запросувања на самиот финиш на трката.
Вики Клинчарова
