Русија денеска ја обвини Украина дека користела проектили што ги добила од САД за да убие жени и деца во јужна Русија, обвинувајќи го за тоа и Вашингтон.
Веднаш откако американскиот државен секретар Ентони Блинкен одобри напади со американско оружје на територијата на Руската Федерација, украинските сили ги гаѓаа станбените области на Белгород со повеќецевен ракетен систем Химарс, изјави портпаролот на руското Министерство за надворешни работи, Марија Захарова.
– Веднаш по изјавата на Блинкен, буквално само неколку часа подоцна, украинските сили гаѓаа станбени области на Белгород. Тоа го направија со американски ракети Химарс – нагласи Захарова, пренесува руската новинска агенција ТАСС.
Според неа, најавите од Вашингтон за одобрување напади со американско оружје на територијата на Русија претставуваат „признание за страдањата на жените и децата во регионот на Белгород“, а остатоците од ракетите Химарс ќе бидат претставени како директен доказ.
Захарова не презентираше слики од фрагментите од ракетата. Таа не кажа колку луѓе загинале во наводниот инцидент.