Захарова: Не смее да се дозволи во Србија да владее хаос

by Fokus

Министерството за надворешни работи на Русија денеска по повод тримесечните протести во Србија соопшти дека не смее да се дозволи да владее хаос во земјата која и онака се соочува со бројни надворешни и внатрешни предизвици, изразувајќи надеж дека Србија ќе го реши проблемот на мирен начин.

„Исклучително е важно демонстрантите, пред се лидерите на јавното мислење, да покажат здрав разум и да не ги следат оние што будат емоции. Не смее да се дозволи во Србија да владее хаос во врска со ова. Земјата веќе се соочува со бројни надворешни и внатрешни предизвици“, се наведува во одговорот на официјалната претставничка на Министерството за надворешни работи на Русија, Марија Захарова, на прашањето на медиумите за протестите во Србија.

Во одговорот објавен на сајтот на руската амбасада во Белград, Захарова наведува дека „расколот е најопасна работа“ и додава дека „раководството на Србија прави се за да спречи драматичен развој на настаните“.

„Безбедносните органи постапуваат професионално, почитувајќи го правото на народот на мирен собир. Преземени се сериозни чекори за решавање на несогласувањата, имајќи ја предвид загриженоста на граѓаните. Гледаме дека властите ги слушаат најважните сигнали. подготвеност за директен дијалог со сите во рамките на политичкиот процес“, рече Захарова.

„Убедени сме дека српскиот народ ќе успее да ја зачува братска Србија како независна, самоодржлива, угледна држава и нема да дозволи земјата да го изгуби својот лик. Го цениме нашето пријателство со Србија и сакаме таа да ги реши своите проблеми на мирен начин како што поскоро“, порача Захарова.

Поврзани новости