Премиерот Зоран Заев денеска откри дека поранешниот вицепремиер Владимир Пешевски и министерот за финансии Кирил Миновски, од владата на Никола Груевски, се повлекле од советничките позиции на вицепремиерот Фатмир Битиќи, поради како што рече, критиките од јавноста.
За советниците на вицепремиерот за економски прашања, координација со економските ресори и инвестиции Фатмир Битиќи, премиерот Заев одговори дека вицепремиерот почнал постапка на разговори, консултација односно со консултанти, не со советници, не платени нови советници или функционери, туку, како што рече Заев, на консултации со огромна група граѓани, преку 20, 50, стотина, се со конечна цел, да се соберат информации од сите страни за да се создаде национална економска стратегија, по која треба сите овде да се придржуваа.
– Голем дел овде се луѓе и од опозицијата, двајцата споменати се повлекоа под критики на јавноста, тој се повлече. Сакам да ги потврдам принципите. Често разговарам јас со Мицкоски, за кој мислам дека подеднакво е инволвиран, виновен во глупости од тој период 2006 до 2016 година, па седнуваме разговараме на вакви теми. Тоа не значи дека некој е член на Влада, учествува во советник во кабинет на некој министер, потпретседател на Влада или слично. Но затоа сме транспарентна влада веднаш реагираме и така соодветно реагираше потпретседателот на Влада Битиќи, изјави Заев.
Премиерот Заев одговарајќи на новинарско прашање во однос на истрагите за автопатишта и во таа насока за околу 155 милиони евра, информира дека за тоа се водат судски постапки. Изрази убедување дека согласно доказите и аргументите оти ќе има и судска пресуда заради тоа што, посочи, видовме дека аболициите не се на сила односно не може никој да ги поништи. Судските предмети од СЈО кои се уште не се завршени, потенцира Заев, продолжуваат по законски, транспарентен пат, преку правосудсните државни органи.