Десет имиња ќе се разгледуваат како можен консензуален кандидат на владејачката коалиција за престојните претседателски избори и можно e уште денеска да се знае името на кандидатот, порача денеска премиерот Зоран Заев.
СДСМ, коалициските партнери и другите партии кои даваат поддршка за заеднички претедателски кандидат, вечер во 20 часот во хотел „Хилтон“ ќе одржат средба на која треба да биде утврдена личноста што ќе влезе во трката за нов шеф на државата на претстојните шести по ред претседателски избори.
Заев одговарајќи на новинарско прашање дали Стево Пендаровски е фаворит за консензуален кандидат, рече дека тој е еден од кандидатите, кои ќе бидат ставени на разгледување.
-Во контакт сме со сите политички партии, кои ја изразија својата подготвеност да застанат за заеднички кандидат. 10 имиња се за разгледување, секако имаме и свои фаворити заради тоа што граѓаните ни испратија јасна порака за тоа каков претседател посакуваат да има нашата земја. Ќе ги земеме предвид сите аналитички аспекти во смисла идниот претседател на Република Северна Македонија да биде претседател на сите граѓани, кои ќе го чуствуваат за свој, а истовремено веруваме ќе биде и доволно мотивирачки фактор за да добиеме голема излезеност, истакна Заев по денешната посета на „Алкалоид“.
