Тензиите во источна Украина драматично се зголемија кога сепаратистите поддржани од Русија почнаа артилериски оган преку контролната линија со украинските сили, гранатирајќи една градинка во четвртокот, а три лица беа повредени, пренесуваат светските агенции.
Жител на градот во источна Украина, каде што градинката беше погодена, изјави дека мислел оти војната почнала кога слушнал артилериски оган.
-Се спремавме да одиме на работа, имаше многу врева, не беше далеку. Сите бевме вознемирени и испаничени бидејќи знаевме и очекувавме некои провокации токму во овој момент, па мислевме дека војната навистина почна – вели жител на станицата „Луганска“.
Украинската армија соопшти дека 32 гранати паднале врз градот, при што е повреден еден војник и прекинато е напојувањето со електрична енергија. Инцидентите се случуваат во време на глобална загриженост поради можноста за поширока војна со повеќе од 100.000 руски војници во близина на украинската граница.