Претседателот на Србија, Александар Вучиќ, вечерва, реагирајќи на протестите пред Собранието на Град Белград и РИК, изјави дека „во Белград не е во тек револуција“.
-Ништо од тоа нема да им успее и мораме да се потрудиме да не повредиме некој од случајните демонстранти со мирна реакција, рече тој.
Вучиќ рече дека на протестот се собрале 2.490 луѓе.
-Во овој момент заедно со оние кои се обидуваат да упаднат во Градското собрание има 1.195 лица. Истовремено, сакам да кажам дека некои го покажаа своето лице, дека насилството е единствениот начин да се борат против политичките противници, рече Вучиќ во обраќањето до јавноста.
Протестот на опозицијата собрана околу коалицијата „Србија против насилство“ започна вечерва пред зградата на Републичката изборна комисија (РИК) во Белград, а по обраќањето на претставниците на коалицијата, граѓаните се префрлија кон Градското собрание во Белград.
Таму имало инциденти, граѓани се обиделе да влезат, го скршиле стаклото на вратата, а полицијата ги испрскала со бибер спреј.