Крајот на летната сезона и почетокoт на училишната година го зголемија протокот на патници на наплатните станици на автопатите ширум Македонија, а модернизирањето на рампите со воведување наплата со М-ТАГ и М-Кард требаше да го олесни патувањето и да го намали чекањето.
Сепак кога има малку зголемена фреквенција на патиштата, на виделина излегуваат некои проблеми при поминувањето и наплаќањето на патарини.
Дел од граѓаните се жалатдека со својот М-ТАГ уред мора да чекаат на лента наместо да поминат со 20 км/ч поради тоа што наплатната станица има уред за наплата со картичка на истата лента, додека еден дел се пожалија на тоа дека М-ТАГ уредот не функционира на наплатните станици. Тоа пак создава нова гужва затоа што возачите мора да се вратат назад и да променат лента за наплата.
„Во моментов се работи на модернизацијата на наплатната станица Миладиновци и работите се одвиваат според договорните услови. Што се однесува до уредите М-таг на наплатните станици генерално е во ред, но проблеми главно се јавуваат од страна на корисниците кои неправилно го користат нивниот М-таг уред.
Имено, уредот М-таг најдобро функционира кога е поставен (залепен) на соодветно место од каде го испраќа правилно сигналот до уредот на рампата. За жал корисниците на М-таг најчесто уредот го држат во раце каде е голема веројатноста да не се прочита и тогаш настанува проблем бидејќи возилото е веќе регистрирано на лентата.
Апелираме секое возач кој користи М-Таг уред наместо да го држи во рака да го постави (залепи) на оригиналниот држач со што нема да се појавуват проблеми во неговото исчитување“, велат од ЈПДП за „Фокус“.
Наплатните станици во Тетово и Гостивар, како што велат од ЈПДП, немаат електронска наплата, но наскоро и овие станици ќе се модернизираат. Модернизацијата на наплатните станици со М-ТАГ и М-Кард ќе заврши кога ќе заврши изградбата на Коридорот 8. Претходно треба да заврши модернизацијата на наплатната станица Миладиновци .
Во првите шест месеци од 2026 година, државата инкасирала рекордни 1,92 милијарди денари, или нешто над 31 милион евра од наплата на патарина. Во споредба со ланската година се наплатени 21,9 милиони денари повеќе, односно 350.000 евра.
Од наплата на патарини минатата година (заклучно со 23 декември) беше остварен промет од 4.158.914.362 денари (67.624.624 евра) и оваа бројка, со оглед на зголемената фреквенција во јули, август и во септември, ќе биде сигурно надмината во текот на оваа календарска година.
Јавното претпритијатие за државни патишта (ЈПДП) информира дека најфреквентна наплатна станица е Тетово, додека според собраните средства и цената на билетите, највисоки приходи има на Романовце, кај Куманово по што следуваат Миладиновци, Петровец, Глумово, Желино, Тетово, Стоби, Преод, Гостивар, Сопот, Гевгелија, Кадрифаково, Отовица и Демир Капија.
Учеството на електронската наплата со М-Кард и М-ТАГ, во вкупниот промет на наплата е 36 проценти, од вкупно 11 наплатни станици каде што е воведена.
Државата размислува да го промени системот на наплата на патарините со цел да го задржи високиот приход од над 65 милиони евра годишно. На коридор 8, кој сè уште не е изграден, се проценува можноста да се воведе затворен систем на наплата, односно возење и наплата според изминат километар. Вињетата, начин на наплата кој граѓаните го гледаат како поевтино и стимулативно решение за користење автопатишта без трета лента, засега не се опција за државата.
Инаку, електронскиот систем за наплата на патарините во државава е воведен од јули 2019 година на наплатните станици Романовце, Отовице, Сопот и Градско на Коридорот 10, како и на Петровец. На Коридорот 8 наплатната станица Глумово профункционира како целосно електронска на 4 април 2024 година, а Желино се трансформира во електронски систем еден месец подоцна.
Орце Костов