Турскиот претседател Реџеп Таип Ердоган изјави дека во Црното Море се откриени дополнителни 58 милијарди кубни метри природен гас, јави агенцијата Анадолија.
– Нашиот брод за сондажа „Фатих” откри 58 милијарди кубни метри резерви природен гас, 3.023 метри под морето, во блокот Кајкума 1, изјави Ердоган по состанокот на владата во претседателскиот комплекс во Анкара.
Наведувајќи дека турските резерви на природен гас во Црното Море изнесуваат 710 милијарди кубни метри со пазарна вредност од еден билион долари, Ердоган рече дека крајната цел на Турција е што поскоро да прогласи енергетска независност од странска нафта и природен гас.
– Нашето ново истражување ќе го отвори патот за слични истражувања во други геолошки полиња во соседството на регионот. Ќе започнеме нова сондажа што е можно поскоро, додаде Ердоган.
Говорејќи за борбата против тероризмот, Ердоган најави дека Турција „ќе ги затвори празнините во безбедносниот појас долг 30 километри и ќе преземе нови чекори за целосно отстранување на заканите што терористичките организации во Сирија ги претставуваат за Турција”.
– Ќе влеземе во нова фаза од борбата која ќе ги уништи целата инфраструктура и ресурсите на терористичката организација (ПКК и ЈПГ/ПКК), од која ја добива силата, како и нејзините вооружени капацитети, истакна турскиот претседател.
Како што потсетува Анадолија, ПКК и нејзиниот сириски огранок ЈПГ/ПКК користат терористички бази преку турската граница во северен Ирак и северна Сирија за планирање и извршување напади врз Турција. По должината на сириската граница, организацијата работеше на создавање терористички коридор, заканувајќи им се и на сириското и на турското локално население.
Во својата над 35-годишна терористичка кампања против Турција, ПКК, која е ставена на листата на терористички организации од страна на Турција, САД и ЕУ, одговорна е за смртта на над 40.000 луѓе, меѓу кои и жени и деца. ЈПГ е сириски огранок на терористичката ПКК.
Од 2016 година, Анкара започна три успешни антитерористички операции преку својата граница во северна Сирија со цел да спречи формирање терористички коридор и да овозможи мирно враќање на жителите: „Штитот на Еуфрат” (2016), „Маслинова гранка” (2018) и „Извор на мирот” (2019). Официјалните претставници на Турција навестија дека следи уште една таква операција.