Се работи за сто столбчиња, чија намена е да се спречи паркирањето на автомобили на тротоарот, каде во изминативе години воопшто немаше простор за движење на пешаците.
Од општината информираат дека столбчиња ќе бидат поставени и пред ООУ ,,Гоце Делчев’’, како и на плоштадот, каде старите и оштетени ќе бидат заменети со нови. Во градот реакциите поради оваа активност се поделени.
Дел од граѓаните сметаат дека поставувањето на столбчињата е за поздрав, додека голем е бројот и на оние според кои нештата требало да одат по спротивен редослед, односно првин да се изгради паркинг простор, а дури потоа да се блокираат тротоарите, каде граѓаните ги паркираат возилата. Вака, најчесто коментираат на социјалните мрежи посветени на општината, нема ефективно решение, бидејќи ќе дојде само до поместување на паркираните возила подоле долж главната улица.
И станари во зградите во центарот реагираат бидејќи нема каде да ги паркираат сопствените автомобили, поради тоа што на тротоарите пред нивните згради постојано се оставаат возила на луѓе кои работат во близина, или пак имаат да завршат некоја работа низ градот. Недостигот на паркинг простор во Неготино е проблем кој што со тек на годините станува се позабележителен. Ако во минатото вообичаено беше домаќинствата да имаат по еден автомобил, денес речиси секое домаќинство има по два, па и повеќе автомобили. Навика на граѓаните е и да патуваат со автомобил дури и за кратки релации, до блиска продавница или до кафуле во центарот, со што се создава сообраќаен метеж, а проблемот е посебно изразен во пазарните денови.
Вики Клинчарова