Владимир Путин на сите верници и руски граѓани им го честиташе Божиќ

Рускиот претседател Владимир Путин денеска преку телеграма објавена на веб-страницата на Кремљ им го честиташе Божиќ на православните верници и на сите руски граѓани.

„Им го честитам Христовото раѓање на православните христијани и на сите граѓани на Русија. Овој светол, долгоочекуван празник им е драг на милиони луѓе ширум светот. На верниците им дава радост и надеж, инспирира добри мисли, дела и постапки“, рече Путин.

Тој додаде дека за време на божиќните празници јасно чувствуваме со сето срце колку е важно семејните традиции да се пренесуваат од генерација на генерација, пренесе РИА Новости.

Путин присуствуваше на вечерната божиќна богослужба во црквата Великомаченик Георгиј на ридот Поклонја во близина на Москва.