Владата на денешната седница побарала од Надзорниот одбор на Акционерско друштво за поштенски сообраќај „Пошта на Северна Македонија“ да го отповика Јани Макрадули од должноста претседател на Управниот одбор и генерален директор на „Пошта“.
Ова практично значи дека тој повеќе нема да биде директор на „Пошта“, одлука која доаѓа без никаква претходна најава.
„Фокус“ побара изјава од Макрадули зошто е разрешен и дали добил некакво образложение од Владата, но тој само кусо ни рече дека нема коментар.
Инаку, разрешувањето доаѓа откако пред пет дена доскoрешниот директор договори покачување на платите за вработените за 3.000 денари, прво зголемување на платите во „Пошта“ после 20 години.
Макрадули со Синдикатот по договорот за зголемување на платите
Откако синдикатот почна штрајк, Макрадули уште на првиот ден се сретна со синдикалнците и договорија покачување на платите, но со компромис: од 1 јуни годинава линеарно да се зголемат за 3000 денари платите на 1700 вработени од оперативниот дел (поштари, шалтерски работници и други), а од 1 август покачување со тој износ да добијат и административните службеници во ова акционерско друштво во државна сопственост.
Сега со неговото разрешување останува нејасно дали ова договорено покачување ќе го реализира новиот директор, а тоа е Васко Стефанов кој доаѓа од позицијата заменик-директор на Агенција за вработување на Република Северна Македонија.
По доаѓањето на директорската позиција, Макрадули воведе новини во работење на „Пошта“, како услугата онлајн продавницата со сопствена достава. Изминатиот период се среќаваше со градоначалниците низ државата, со цел „Пошта“ да го преземе разнесувањето на писмата за општините.
К.С.Б.