Поранешниот претседател Доналд Трамп реагираше на изјавата на рускиот претседател Владимир Путин кој рече дека повеќе би сакал да победи Џо Бајден отколку Трамп, бидејќи Бајден е „поискусен“ и „попредвидлив“, што според Трамп е „одличен комплимент“.
– Рускиот претседател Путин само ми даде голем комплимент. Тој само рече дека повеќе би сакал Џо Бајден за претседател отколку Трамп. Сега тоа е комплимент. Многу луѓе рекоа: „Ох, тоа е срамота“. Не, не, тоа е добра работа. И, се разбира, тој би го рекол тоа“, рече Трамп на предизборниот митинг во Северен Чарлстон, Јужна Каролина.
Последниот коментар на Трамп доаѓа веднаш откако тој неодамна рече на претходниот митинг во Јужна Каролина дека ќе ја „охрабри“ Русија да „направи што сака“ на странските сојузници на Соединетите држави кои не го плаќаат својот „фер дел“ од финансирањето на одбраната, што предизвика бурни реакции.
Последните коментари на Трамп беа одговор на коментарите на Путин за време на интервјуто со дописникот на руската државна телевизија, во кое тој, наводно, рекол дека верува оти реизборот на Бајден би бил подобар избор за интересите на Русија – иако додаде дека ќе соработува со кој било американски лидер.
– Бајден, тој е поискусен, попредвидлив, тој е политичар од старата гарда – рече Путин според преводот на интервјуто на Асошиетед прес. – Но, ние ќе работиме со секој американски лидер на кого американскиот народ има доверба.
Трамп на митингот во Северен Чарлстон рече дека Путин би сакал победа на Бајден бидејќи тој лично застанал зад интересите на Русија додека бил претседател, особено на изградбата на Северен тек 2, контроверзниот германско-руски гасовод што ќе пренесува природен гас од Русија до Европа.
Trump calls new Putin comments 'a compliment' pic.twitter.com/ciOjtjAFCq
— The Epoch Times (@EpochTimes) February 15, 2024
„Го прекинав Северен тек 2 и (Бајден) го одобри веднаш откако заминав, така што Путин навистина не е мој обожавател“, рече Трамп, мислејќи на неговата улога како претседател во стопирањето на изградбата на гасоводот со воведување санкции и последователното откажување на Бајден од санкции за гасоводот, за кои критичарите веруваа дека ќе и дадат на Русија енергетска доминација над Европа.
– Не ме сака. Тој го сака Бајден затоа што ќе му се даде се што ќе посака, вклучително и Украина. Ќе го оствари својот сон да ја добие Украина поради Бајден… Единствениот претседател од последните пет што не и дал ништо на Русија е претседателот познат како Доналд Џеј Трамп – изјави Трамп за односот меѓу Путин и Бајден.
Во текот на предизборната кампања, Трамп постојано зборуваше за добри односи со Путин, нарекувајќи го „паметен“ и тврдејќи дека доколку тој беше реизбран, немаше да се случи тековната украинско-руска војна.