Тропската бура Трами уби најмалку 26 луѓе, а повеќе од 150.000 принуди да ги напуштат своите домови на Филипините, соопштија утринава властите, откако невремето го зафати североисточниот брег на архипелагот.
Трами, локално познат како Кристине, донесе силен дожд на главниот остров Лузон, предизвикувајќи големи поплави и лизгање на земјиштето. Со максимална брзина на ветер од 95 км/ч, бурата се движи кон запад низ планинскиот северен регион Кордилера кон Јужното Кинеско Море, соопшти државната метеоролошка агенција.
Во некои северни провинции има предупредување за обилни до интензивни врнежи од дожд, поплави, лизгање на земјиштето и невреме.
Повеќето од жртвите од невремето се должат на давење и лизгање на земјиштето во централниот регион Бикол, вклучително и градот Нага каде утринава беа пријавени 14 смртни случаи, соопштија властите. Владата нареди затворање на бизниси и училишта на патот на невремето во пресрет на силен дожд и поплави.
Повеќе од 163.000 луѓе се засолниле во центрите за евакуација, соопшти канцеларијата за цивилна одбрана, повеќето од нив во Бикол бидејќи жителите ги напуштиле своите домови откако водата стигнала до покривите. Регулаторот за цивилна авијација во четвртокот соопшти дека поради невремето се откажани десетина летови низ земјата.
Централната банка втор ден по ред го откажа тргувањето со девизи и монетарното работење. На Филипините обично се забележуваат просечно 20 тропски бури годишно, што често резултира со обилни дождови, силни ветришта и смртоносни лизгања на земјиштето.