Битолчани денеска ги расчитуваат последиците од силниот ветер што синоќа го зафати градот и откорна покриви, сруши огради и откорна дрвја.
Според Управата за хидрометеоролошки работи (УХМР), ветрот бил со брзина од над 65 километри на час и дувал со силен интензитет се до ноќта.
Ветрот откорна покрив од зграда кој падна врз автомобил на улицата „Леринска“. Нема информации за повредени, но направена е материјална штета. Ветрот урна и ограда на градежен плац во старата битолска касарна.
Градоначалникот Тони Коњановски ги посети локациите на кои ветрот ги вознемири битолчани. Информираше дека екипите на локалните јавни претпријатија и пожарникарите ќе извршат санација на местата каде е предизвикана штета. Од општина Битола информираа дека надлежните екипите дејствувале координирано и работеле на расчистување на теренот.