Боби, португалското куче кое во февруари беше прогласено за најстарото куче на светот од Гинисовата книга на рекорди, во четвртокот го прослави својот 31-ви роденден.
Семејството на Боби планираше роденденска забава во сабота во неговиот дом во Конкеирос, село во јужна Португалија, пренесе Си-Ен-Ен.
Претходно, неговиот сопственик Леонел Коста изјавил за Гинис дека тоа ќе биде „многу традиционална“ португалска забава, на која ќе присуствуваат повеќе од сто луѓе, а ќе настапи и танцова група, се вели во соопштението.
Коста изјавил дека Боби ужива огромно внимание откако ја понесе титулата за најстарото куче на светот и дека многу новинари и луѓе од целиот свет доаѓаат да се сликаат со него.
Тој додаде дека кучето е во добра здравствена состојба и дека неодамна било прегледано поради стрес, поради честите посетители и фотографирање.
Боби е раса на португалско овчарско куче, а според неговиот сопственик, тој имал потешкотии со одењето и слабеење на видот во последните години.