ВМРО-ДПМНЕ многу јасно и недвосмислено подава рака за национално обединување и иницира подготовка на стратегија за државата до 2050 година. Приоритетот интеграција на Македонија во ЕУ е јасен, но на патот до негово исполнување треба да реализираме многу работи, да бидеме подобри, подобри пред се за нас. За тоа да се реализира ни треба јасна стратегија како да стигнеме до целта, изјави пратеникот на ВМРО-ДПМНЕ Драган Ковачки.
„Претседателот Христијан Мицкоски јасно кажува дека треба да се дефинираат приоритетите за развој на државата и тоа во повеќе области и да се одговори на повеќе предизвици, како демографски, економски, земјоделски, енергетски, транспортни и слично.
Ги повикуваме СДС повторно да размислат и покрај нивното првично негодување за обединување околу една стратегија со помош на умовите од академската заедница. СДС мора да ја надмине кратколгледоста. СДС мора да прекине да мисли на интереси на поединци од партијата и на партиските интереси“ рече Ковачки.
Тој додаде дека претходната власт седум години ја запоставија Македонија, која, како што вели, не само што стагнираше, туку и назадуваше во одредени области.
„СДС мора да ги сфати зборовите на претседателот Мицкоски кој на 23 октомври во средата кажа цитирам „ова е суштински период верувајте. ова е период од кој ќе се знае ќе не биде или не, знам дека звучи драматично, некому можеби ќе му звучи и патетично, но дали знаете дека ако сакаме да успееме, немаме избор освен да соработуваме и тоа мора да почне веднаш и сега“, затворен цитат.
Ако им треба време нека размислат уште малку, нека не брзаат, за момент кога ќе размислуваат на оваа тема за обединување нека заборават на личните и партиски интереси.
Претседателот Мицкоски конструктивно, во клучен момент подаде рака и ги покани сите заедно да постигнеме договор за Македонија! На потег е опозицијата, на потег е СДС, нека не размислува дневно политички, нека се преиспита. На потег е и академската заедница!“ порача Ковачки.