Видео од настан кој се одржа во декември 2010 година, во Санкт Петербург, а на кое рускиот претседател Владимир Путин првин свири на пијано, а потоа и пее на англиски јазик, деновиве се споделува на социјалните мрежи.
Станува збор за видео снимка направена за време на хуманитарна вечера на која се собирале донации за деца заболени од канцер и болести на очи, а Путин ја пее англиската песна ,,Blueberry hill”, додека голем број на холивудски ѕвезди воодушевено му аплаудираат.
Нивната еуфорија од пеењето на Путин оди до таму што и самите стануваат од масите, и стоечки пеат заедно со него.
Во публиката може да се забележат Шерон Стоун, Кевин Костанер, Голди Хоун, Расел Кроу, Моника Белучи, Жерар Депардје, Мики Рурк и многу други.
-Како и повеќето луѓе, јас ниту знам да свирам, ниту пак да пеам, но многу сакам да го правам тоа – изјави тогаш Путин.
-Во последните јавни излегувања, Путин се повеќе ја покажува својата мека страна, пишуваа тогаш западните медиуми.
Путин, чија агресија го остави светот во неверување, деновиве беше остро осуден од страна на голем број на холивудски ѕвезди кои на своите профили оставија пораки со поддршка до украинскиот народ.
Помеѓу нив се Анџелина Џоли, Мајли Сајрус, Пријанка Чопра, Џаред Лето и други.
-Испраќам љубов и молитви до сите добри луѓе од Украина и Русија кои се заробени во овој корозивен момент на насилство и уништување, особено до младите луѓе! Вие на направивте ништо за да ја заслужите оваа перверзија и непристоен спектакл – напиша актерот Марк Руфало.
Вики Клинчарова