Поради се уште нереформираното судство во Македонија, уредникот на весникот Лајм, Исен Салиу побара од претседателот на Собранието Талат Џафери да упати јавен повик до Демократската Унија за Интеграција и до нејзиниот претседател, Али Ахмети, да ги повлечат тужбите против весникот Лајм и уредникот Исен Салиу.
Такво барање Салиу упати вчера во емисијата Отворено во ТВ 24, каде гостин беше претседателот на Собранието Талат Џафери.
-Сега веќе ниту ВМРО не ги тужи новинарите, само ДУИ го прават тоа, иако велите дека во меѓувреме сте станале реформатори, – рече Салиу, пренесува Алмакос на својата фејсбук страна.
Меѓутоа Џафери одби да упати таков повик кон ДУИ и Ахмети, иако претходно се пофали дека како претседател на Собрание е надпартиска личност. Тој дури рече дека не знае за тужбите на Али Ахмети и на партијата ДУИ против Лајм и уредникот Салиу, иако тие тужби се спомнати и во годишниот извештај на американскиот Стејт Департамент за состојбите во Македонија, во делот на слободата на говорот.