Двегодишно девојче по кое од вчера се трагаше во Романија, утрово е пронајдено мртво, пренесуваат романските медиуми.
Телото на малата Раиса Марија, со траги на насилство било пронајдено во нива на околу 400 метри од нејзиниот дом.
Девојчето исчезнало вчера во раните попладневни часови, додека си играла со другите деца во дворот. Родителите најпрво мислеле дека таа отишла кај дедото, чија куќа е на само неколку метри. Меѓутоа, набрзо сфатиле дека детето никогаш не стигнало до својот дедо.
Потрагата започнала веднаш. Во текот на целата ноќ на терен беа повеќе од 150 полицајци, волонтери и граѓани, а во потрагата беа вклучени хеликоптер, дронови и кучиња трагачи. За жал, телото на девојчето било пронајдено утрово околу 10 часот, а се претпоставува дека е убиена.
Според романските медиуми, телото на девојчето било пронајдено во густа вегетација.
Засега не е познато дали некој е приведен. Полицијата само соопшти дека телото е пронајдено и дека истрагата е во тек.
Пред само два дена Романија ја потресе веста за смртта на осумгодишното девојче Марија, која беше силувана и убиена, а нејзиното тело потоа беше фрлено во атар на селото. За убиството е осомничен братот на нејзиниот очув.