Денеска во Центарот за управување со кризи се одржа седница на Управувачкиот комитет за координација на системот за управување со кризи со која претседавав, а присуствуваа и министрите за одбрана Владо Мисајловски и за надворешни работи и трговија Тимчо Муцунски, како и раководителот на Групата за процена на ризици и опасности Стојанче Ангелов, истакна министерот Панче Тошковски.
-На седницата беше утврдена потребата да се активираат меѓународните механизми за обезбедување на помош во воздухоплови, кои ќе се вклучат во гаснењето на пожарите кои деновиве ја зафатија државата.
Денеска претпладне од Турција пристигнаа два „ер трактори“ и еден хеликоптер, кои веќе активно работат на терен. Во текот на утрешниот ден ќе пристигнат два хеликоптери од Словенија и по еден хеликоптер од Србија и од Црна Гора.
Изразуваме голема благодарност до пријателските земји кои ни помагаат во справувањето со огнената стихија, напиша министерот.
