Украина најверојатно нема да добие покана за членство во НАТО на претстојниот самит на Алијансата на почетокот на јули во Вашингтон, изјави денеска во Брисел американската амбасадорка во Алијансата, Џулијан Смит.
„Не очекувам Алијансата да ја покани Украина на самитот што треба да се одржи од 9 до 11 јули“, изјави Смит пред состанокот на министрите за одбрана на НАТО во Брисел.
Самитот во Вашингтон, смета таа, треба да сигнализира дека Алијансата продолжува да се приближува до Украина и да преземе конкретни мерки за промовирање на идното членство на оваа земја, која моментално е во војна со Русија.
За време на самитот на НАТО минатата година во Вилнус, земјите-членки потврдија дека иднината на Украина е во НАТО, но не поставија временска рамка, како што бараше претседателот Володимир Зеленски пред тој самит.
Сите земји-членки на НАТО признаваат дека членството на Украина во Алијансата е незамисливо се додека војната е во полн ек.