Полскиот премиер Доналд Туск реагираше на извештаите кои ги оживеаја прашањата за тоа кој ги предизвикал експлозиите на гасоводот Северен тек, велејќи дека иницијаторите на проектот за гасоводот треба „да се извинат и да замолчат“.
Коментарите на Туск дојдоа откако еден од неговите заменици ги негираше тврдењата дека Варшава е делумно одговорна за експлозијата. Волстрит журнал објави дека украинските власти се одговорни за експлозиите во септември 2022 година, драматичен чин на саботажа што ја отсече Германија од клучниот извор на енергија и ја влоши енергетската криза во Европа.
Германија беше партнер на Русија во проектот за гасоводот. Полска одамна вели дека нејзините безбедносни интереси се оштетени од Северен тек.
„До сите иницијатори и спонзори на Северен тек 1 и 2. Единственото нешто што треба да направите денес е да се извините и да замолчите“, напиша Туск на X.
-Се чини дека Туск особено реагираше на тврдењето на поранешниот шеф на германската агенција за надворешно разузнавање (БНД), Аугуст Ханинг, кој за германскиот весник „Ди Велт“ изјави дека нападот на гасоводите „Северен тек“ сигурно имал поддршка од Полска. Ханинг рече дека Германија треба да размисли за барање компензација од Полска и Украина.
Ханинг не даде никакви докази за да го поддржи своето тврдење. Некои набљудувачи забележаа дека тој служел за време на поранешниот германски канцелар Герхард Шредер, кој подоцна продолжил да работи за руски државни енергетски компании, вклучувајќи го и Северен тек.